全民造星5｜88號Philip自信過度 一句話焫著Edward收回藍燈 網民：咩話似MC?

ViuTV《全民造星V》噚晚（17日）最新一集，繼續係94位參賽者爭入60強；一共有6位參賽者登場，分別係11號Born、96號樂庭、88號Philip、5號James、82號Mark Chan及63號Bryan，不過六人之中只有樂庭、Philip及Mark Chan可以晉級，其餘三人都只得一盞藍燈，齊齊跌入復活區。

喺噚晚嗰集，樂庭及Mark Chan分別以跳《特務肥姜 2.0》及 唱原創歌《Friendzone Man》作為表演項目，最終雙雙順利進入韋羅莎（Rosa）及馮允謙（Jay Fung）嘅藍組。不過要講到噚晚嗰集討論度最高嘅參賽者就一定係88號Philip（陳彥熹），自稱被指似MC、馬國明及王力宏嘅佢喺面試時已被問覺得自己憑咩入到圍，而充滿自信嘅Philip就回答話：「希望我嘅歌聲，希望我嘅毅力，仲有可能我個樣都OK啲！」再被問係唔係覺得自己係靚仔，佢就話：「由細聽到大啦」，之後佢就唱出MC嘅《小心地滑》，雖然被評判指太油膩及太多修飾，不過好彩都順利入圍。

以全黑打扮出場嘅Philip喺淘汰賽再次唱出MC嘅《小心地滑》，並成功獲得評判們嘅三盞藍燈，不過當時就冇導師撳燈搶佢入組。完成表演後陳詠燊導演表示佢聲底好及表現投入，之後就被問到及擅長扮型係咩意思，之後充滿自信嘅佢即場chok樣，而另一評判Edward Chan就問佢：「咁你本身覺得自己型唔型呀？」，跟住Philip反問佢話：「你覺得呢？」，搞到Edward Chan發火：「咁我而加問緊你，你冇理由問返我㗎」，之後Edward Chan仲滅燈，將原本俾嘅藍燈轉返紅燈，並話：「我問你問題，你又問返我問題，咁呢個就唔係一個好嘅對答，同埋呢個藍燈收返，就係令你明白有啲事情唔係你所控制咁就要humble（謙卑）啲」。Edward Chan呢個舉動雖然無阻Philip晉級，並成功進入陳蕾及陳健安嘅紅組，不過就引起全場嘩然。

節目出街後，唔少網民都留言話覺得Philip除咗唔似MC之外，仲話佢太過有自信及太串，同時亦大讚Edward Chan收燈收得好，例如「邊度似MC」、「真人一啲都唔MC」、「咩話似MC? 有眼耳口鼻就似？」、「呢條仔好油膩」、「自戀型人格」、「um... 可唔可以foul左佢」、「衰太有自信.jpg」、「轉Key唔好，咬字又唔清，好難搞喎」、「有唱功但把聲好難聽」、「一個mc已足夠，唔需要多個copy」、「值得入 雖然唔鐘意」、「好串 抵死」、「過度自信，太串嘴」、「收得好，點醒佢，咁自大」、「Edward好絕 欣賞」及「收燈收得好，唔係比賽提醒佢，出黎做野點算」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！