全民造星V冠軍Lyman香胤宅 克服聽障成音樂劇演員 同太太一齊紐約追夢

《全民造星5》尋晚圓滿結束，由美國返港參賽嘅Lyman香胤宅以大熱姿態成為冠軍。Lyman雖然33歲，年紀比唔少參賽者大，但係超強實力背景令佢嘅演出備受注目，到後期不論人氣定表現都力壓各人。

香胤宅Lyman喺夏威夷出世，香港成長，長大後到美國修讀表演課程並發展演藝事業。Lyman爺爺香海係資深演員，爸爸係廣播工程顧問，喺港台識唔少人。Lyman自細喜愛表演，其開始學習國標舞、交際舞等，仲贏過全國交際舞冠軍。後來Lyman去咗英國修讀戲劇，畢業後去到美國紐約成為舞蹈老師，又成為音樂劇《芝加哥》嘅全國巡迴演員。不過因為新冠疫情令演出叫停，Lyman喺未知去向下，決定參加《造星5》北美遴選，最終被MIRROR正副隊長Lokman（楊樂文）同AK（江𤒹生）相中入圍。

Lyman同太太Zoe拍拖多年，並於3年前結婚。原來佢地中學已經相識，但Zoe曾經嫌Lyman太嘈而未有發展，後來英國讀書先撞返並擦出火花。Zoe同Lyman一樣都喺紐約發展表演事業，《造星》決賽後Lyman承認會留喺香港，太太亦會一齊。值得一提係，Zoe賽前喺IG出story，原來佢為十強人馬煲咗蘋果雪梨水，相當sweet！

Lyman喺決賽當晚演出時與拍檔Alina（李炘頤）以手語溝通，並自爆有一邊耳聽力受損，並希望聽障者搵到表達自己嘅方式。不過呢個演出喺第一輪得分只係排名第7，好在第二輪演出加上觀眾投票，幫Lyman追返唔少分數，最終即使同KC(黃家灝）同分，但因為觀眾投票得分佔優而勝出。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！