其實我唔係好想要你封利是

「先生呀先生！請問你有冇拍拖？」
「吓？」

「咁先生你搵幾錢個月？畢咗業幾耐？」
「你係咪痴線㗎！」

「先生你幫我做份問卷，幾個鐘左右，會送返張二十蚊同飲食禮券比你㗎。」
「行開啦！」

「小姐呀小姐！請問你今年幾歲？」
「關你咩事呀！」

「你點解一個人嘅？你男朋友呢？有冇打算三十歲前結婚？」
「喂！你好喇wo！」

「唔係呀小姐，我哋會比返五十蚊同一盒鮑魚麵比你㗎。」
「你拎去餵狗啦！」

如果街上面有人截停你問問題，你會答到幾深入？點解無升職？點解唔拍拖？仲收緊利是嘅你，可能自己都好憂鬱，沉思緊幾時先會遇見命中注定嘅伴侶，從此唔再做收利是個一位。

但係呢個年關，最困擾嘅仲未係另一半幾時出現，而係三姑六婆無止境兼無底線嘅盤問，係一大班唔知乜水嘅親戚面前，將你公開處刑。學業、事業、收入、感情狀況、生活習慣、政治取向，無論你咩年紀、什麼性別，久經歷練嘅長輩都可以搵到最令你尷尬嘅問題，令你不知所措。

你好想大叫一聲：「夠喇！」你想面前呢班人知道有樣嘢叫社交禮儀，人哋唔主動提起私隱，唔應該走去問。尤其是雙方唔係好熟，最穩陣係講下天氣，講下舊年去沖繩旅行，炒苦瓜好正，海灘好藍。

香港要改善社會風氣，首先從農曆新年開始。熟人唔使等新年先嚟熟，既然唔熟，唔好扮熟。讓陌生保持陌生，你話幾好呢？當面前果位親戚乜乜乜又開始吹噓佢咸豐年前見過你賴屎賴尿，或者你最想講嘅係：「如果可以再出世一次，其實我一開始就唔係好想要你封利是。」