前TVB惡人綠葉彭皓鋒患直腸癌 需施手術切除肛門 或終生孭造口袋

今年53歲嘅前TVB藝人彭皓鋒，星期一晚為黑妹（李麗霞）、韋綺姍和彭家麗舉行嘅慈善演唱會擔任嘉賓，獻唱前突然自爆患上直腸癌，更透露過幾個禮拜可能就要做手術切除肛門，術後更要終生孭住造口袋。

彭皓鋒表示今年7月時因身體不適而睇醫生照腸鏡，發現直腸有個5cm大嘅腫瘤，而且位置好接近肛門。因為要戒口，彭皓鋒食量減少，體重喺幾個月間由210磅急跌到170磅左右，暴瘦三十磅！

醫生建議彭皓鋒做手術切除腫瘤，但同時亦要切除肛門，餘生將要與造口袋共存。彭皓鋒本來排咗期11月中做手術，但而家仍未做決定。

由於演唱會係為兒童癌病基金籌款，彭皓鋒借機會喺台上分享確診後嘅感受，佢話因為今次患病而發現太太好愛佢，又寄語病者親友唔好太擔心，最緊要有好心情。

彭皓鋒係歌手彭家麗細佬，1996年加入TVB後，經常獲安排演收數佬同黑幫嘍囉而成為「御用惡人」，到2012年離巢並轉投王維基旗下香港電視。約滿後成為自由身藝人，並開始北上工作，發展機會唔錯，更以網路電影《老師上錯身》獲美國荷里活國際電影節最佳男配角獎。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！