劇迷追睇「賣豬」 陳星妤懵盛盛做小三 海外有情敵

陳星妤初次拍劇,坦言拍攝「愛情動作戲」壓力最大。
陳星妤初次拍劇,坦言拍攝「愛情動作戲」壓力最大。

無綫新紮小花陳星妤在處女劇《一舞傾城》接受高難度挑戰,角色不停轉換身份,甚至在不知情的狀況下成為第三者。她坦言現實生活中同樣遇過「三人行」局面,不禁慨嘆:「啲男仔唔係咁簡單。」

陳星妤首次拍劇,已由學生、啤酒妹、舞女、小三再演到加入娛圈拍戲,在20多集的劇集中不停轉換身份。最近劇情講到她被母親袁潔儀游說「賣豬」,前晚更被「媽媽生」莊鍶敏狂摑5巴掌,頓成網民熱話。談到第一次拍劇,她笑說:「收到完整劇本發現原來咁重戲!嚟緊我驚再被劇迷批判,因為會交代我抵受唔住男人(關楚耀)嘅花言巧語而『被小三』(不知情下成為第三者)。」她指現實生活中,感情同樣遲熟:「正式嘅初戀去到成20歲,至今拍拖次數5隻手指數得晒,不過同角色一樣遇過『被小三』嘅經歷,而且唔止一次!」

原來星妤於中學時代初來港生活及求學,難以抵抗美食的誘惑而發胖,加上箍牙,種種外在條件令她一度自我放棄:「當時畀同學叫『粉果達人』,真係肥到冇腰!我又諗咁辛苦由內地落嚟讀書,應該要注重學業,所以大學後先敢闖情關。(點樣『被小三』?)發覺男仔唔係咁簡單,當佢見得你好疏就知道發生乜事,我仲天真到以為佢忙做嘢。有個畀我發現原來喺海外有個女友,佢話大家其實唔會再見,我叫佢搞掂先嚟搵我。」

靠關楚耀傳授床技

對於今次劇中兩位男友,星妤讚口不絕:「高鈞賢係暖男,好照顧我。我哋喺佛山開工,而佢屋企喺廣州,出出入入都會車埋,又叫佢助手幫我。而關楚耀喺『愛情動作戲』方面好有經驗,可以指點我。今次拍劇好開心,導演畀機會我自由發揮,剛開工時我連點望鏡頭都冇概念,大家肯幫我,覺得自己一路拍一路有進步。」對於未來接演的角色,她顯得野心勃勃:「好想挑戰奸角,因為我唔似奸人,唔似就愈想試!同埋我唔想被外表嘅柔弱決定戲路,《宮心計》姚金鈴呢類角色就係我目標。坦白講,直至依家我拍咗嘅兩套戲都唔係純TVB製作,好多監製對我嘅印象同認識都唔深,所以希望快啲有機會獲派演公司劇,相信係好好嘅體驗及演技磨練。」

另外,姚子羚前晚在《一》劇為好姊妹陳星妤出頭,扯頭髮、互摑兼起飛腳樣樣齊,子羚笑言:「難得同女演員打,但拍完見到佢哋啲手紅晒好心痛。有個動作係我打完莊鍶敏再打莊思明,思明成個人撞埋櫃度,佢撞完跌落地下令我好緊張,即刻問佢有冇事。」

姚子羚為姊妹出頭,一個打幾個!
姚子羚為姊妹出頭,一個打幾個!