劉鑾雄直指《愛回家》有演員「硬膠樣」 古佩玲：大家都笑得好自然

富商劉鑾雄（大劉）過往曾提及自己每晚無嘢做食飯就會睇TVB處境劇《愛·回家》，認為如果冇睇《愛·回家》嘅人就有少少失敗，可謂係《愛·回家》忠實粉絲。日前（10日），大劉舉行記者會澄清近日網上傳聞，期間就被現場記者問到佢最近有冇看《愛·回家》，大劉就回答有時候都會睇，又提到有演員個樣好硬膠：「講起《愛·回家》就好笑，我見到有個角色﹐廢事開名，一陣話我針對佢。個（演員）硬膠個樣，啲肉實到呢，唔識郁的。」雖然記者有再追問係邊個，但大劉始終都無講，僅表示係女演員：「男好少整到咁硬膠，一定係女喇，唔識郁架啲肌肉，笑起上來硬磞磞，人哋都係為咗搵食啫。」大劉呢幾句說話惹起網民好奇心發作，紛紛於討論區競猜大劉所講嘅女演員係邊個。

網民列出嘅嫌疑人包括滕麗名、林淑敏、樊亦敏、葉蒨文、莊思明、湯盈盈、古佩玲、劉思希，不過有網民指劉思希早於2020年起因檔期問題暫別劇組，所以好快就排除在外；又有網民覺得林淑敏飾演大小姐一角表情誇張豐富，覺得唔似形容緊佢。有網民就估係飾演神婆申瑞素（June）一角嘅古佩玲，網民指古佩玲愈來愈多戲份，但個樣就愈來愈膠：「擺明係講姓古果條女」、「肯定係June，我第一次見到佢已經覺得佢整到好樣衰」、「玩完韻律泳唔記得拎走個鼻夾咁」等等。

古佩玲於參與慈善節目《善心滿載仁愛堂》期間回應傳媒提問，表示自己無留意報道，亦維護一眾女演員，覺得大家都笑得好自然。另外，樊亦敏向傳媒表示，自己平日笑得好自然加純天然，一定唔係講佢，仲反問記者大劉有冇暗示係邊個。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！