區議會選舉︳宋芝齡 謝芷倫老公馬志恆俱未能當選

今屆區議會選舉於星期日完成投票，各地區直選結果亦陸續公布。今屆代表自由黨於灣仔區參選嘅《流行都市》主持宋芝齡，以3043票未能當選，敗給獨立候選人李碧儀及民建聯穆家俊。早喺點票結果公布前，宋芝齡似乎已預計未能當選，喺facebook出post表示「感謝支持」。之後佢再喺facebook出post，似乎一早已經做完運動，仲表示即使面對挫折，但自己比遇到嘅挑戰更強大。

而另一TVB女藝人、《流行都市》另一主持謝芷倫嘅老公馬志恆，出戰九龍城南但同樣落選。馬志恆取得3582票，但當選嘅民建聯吳寶強及經民聯李超宇都取得過萬票。

近年宋芝齡投身政界，今年出任自由黨灣仔支部主席，早排更參加地區派米活動。8月時宋芝齡話暫時唔會參選住，視乎市民反應，睇下接唔接受。不過事隔未夠2個月，自由黨10月舉行記者會公布年底區議會選舉時，宋芝齡正式宣布於灣仔選區出選。宋芝齡同安德尊（大王）嘅「齡尊CP」疑幻疑真，甚至早前為拍節目而拜堂，難怪港聞行家都不禁喺自由黨記者會上問「安德尊會唔會助選」。而自由黨主席邵家輝就回應話「歡迎一路留意每位候選人動態」。不過安德尊選舉日身在海外，未有出現為宋拉票，但宋芝齡話如果當選會搵大王謝票。

同宋芝齡都係《流行都市》主持嘅謝芷倫，選舉前不停為老公馬志恆拉票，更加搵TVB藝人吳若希等幫手。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！