《千其唔好隨便幫人傳緋聞》

以前讀大學到出去做嘢，每隔一排有新同事入職，或者一男一女突然Friend咗，就會傳出佢哋係咪有路嘅傳聞。喺舊公司我哋一班年經人出現咗好多對緋聞男女，我發現千其唔好隨便撮合身邊嘅人。

過去嘅經歷發現，緋聞入面嘅女仔最後都係會不知不覺真係鍾意咗個男主角。由開頭兩個話痴線啦，慢慢講多兩講個女仔會忽然認真咗，會忽然覺得個男主角都好似唔錯，然後唔知點樣神推鬼㧬之下鍾意咗個男仔，唔係一次，係三次都係咁。

三對緋聞男女都係清白之身開始被傳，開頭強烈否認，後來都廢事解釋由得你亂講，當然講嘅人其實好多都係講笑為主，而再後來就發展成個女主角認真咗，然後走去同個男仔表白，但個男主角真係由頭到尾都係心如止水。其中一個女主角仲要係一向好冷酷，點知畀人講多兩講，佢竟然心動。最後三段緋聞都無成真，但係三個女主角都忽然變成遍體鱗傷嘅單戀少女

而我哋呢啲食花生嘅旁人就好似變咗做兇手。

其實女仔真係一種比較容易動心嘅生物，你講多兩講，佢就真係會忽然去考慮眼前嘅人，你講多兩講，佢都會忽然覺得佢同個男仔好似真係有啲嘢，就真係以為可以進一步⋯⋯ 自此之後我就知道，花生都係留喺匿埋自己食好了。