升呢男一溝女神 驚爆原來有「正印」 周嘉洛左右逢源 翹實陳瀅挨住瞓

周嘉洛首做男一即夥拍陳瀅。
周嘉洛首做男一即夥拍陳瀅。

無綫上位藝人周嘉洛驚爆「左右逢源」,據知與蘇韻姿暗撻多時的他,近日被踢爆疑似搭上新歡「宅男女神」陳瀅,他在片場更毫無避忌,公然向女神挨身挨勢,認真好艷福!

現年25歲的周嘉洛憑《愛.回家之開心速遞》「廢青安」一角入屋,前年更在《萬千星輝頒獎典禮》勇奪「最佳男配角」,之後工作機會源源不絕,近月更榮升男一,拍攝古裝喜劇《痞子殿下》。入行以來他僅與《愛》劇中飾演其女友的林凱恩傳過緋聞,近日卻突然被爆「戀情」,更疑似左右逢源!

有讀者爆料指周嘉洛與《痞》劇女主角陳瀅拍出愛火花!事緣藝員衛志豪在社交平台分享拍攝花絮,卻意外「洩蜜」,有眼利網友見到演員等待埋位時,周嘉洛竟公然在人前翹住陳瀅的手兼挨在她的膊頭甜睡,醒目的陳瀅首先發現鏡頭,即有點避忌推一推周嘉洛,之後他才驚訝發現鏡頭,隨即縮手及緩緩坐開一小段距離,陳瀅則笑得有點尷尬並輕拍自己的肩膊。爆料者續指每當周嘉洛拍完自己的戲份後,仍會留廠等女神收工,可見二人關係匪淺!

「真命天女」蘇韻姿:最近冇見面

但好戲在後頭,據知周嘉洛其實早有真命天女,就是《愛》劇飾演其三姨的蘇韻姿!據知2人拍《愛》日久生情,已暗撻一段長時間,在劇組亦已是公開的秘密。雖然2人一直保持低調,但仍有很多蛛絲馬迹,如之前在節目《大整蠱》中周嘉洛以為蘇韻姿「受傷」,真情流露特別緊張,同場的劉丹不經意表示:「今次之後佢哋要派帖,擺埋酒喇!」湯盈盈等亦直接叫周嘉洛打電話給蘇媽媽,可見他們早知2人關係,蘇韻姿更直接問他:「你係咪會幫我照顧我媽咪?」更顯得關係親密。

2人亦不時在社交平台「蜜蜜」互Like放閃,幾乎每一個Post都不會放過。愛跳舞拍片的蘇韻姿常常孖住《愛》的演員拍片,曝光率最高就是周嘉洛,連粉絲對2人的戀情亦十分受落,大讚合襯。

對於爆緋聞,周嘉洛昨日否認與兩女拍拖:「我冇同陳瀅、亦冇同過蘇韻姿拍拖。(咁你做咩挨住陳瀅?)會唔會排緊戲?我係咪瞓着咗?可能通告太密,我諗如果朱敏瀚喺隔籬會仲好挨,哈哈,我成日瞓着咗就不省人事,原諒我。」陳瀅亦口徑一致否認戀情:「其實今次啲通告大家都好辛苦,唔想大家Focus去咗啲緋聞度,今次個個都拍得好開心,我哋呢班後生嘅(演員)變到好Friend,欣賞吓我哋嘅熱誠,夏天拍古裝都可以Keep住冇人冧廠。」至於蘇韻姿坦言拍《愛》時多得周嘉洛及其他朋友幫忙做翻譯,但否認拍拖:「因為我哋同場比較多,嘉洛開咗另一套劇,最近冇見過,所以唔清楚佢近況。」但預告明天將與對方及阮政峰同場出席活動。

周嘉洛挨實陳瀅甜睡,對方未有抗拒。
周嘉洛挨實陳瀅甜睡,對方未有抗拒。
發現鏡頭時,周嘉洛一驚兼自行「彈開」,陳瀅則尷尬笑笑口。
發現鏡頭時,周嘉洛一驚兼自行「彈開」,陳瀅則尷尬笑笑口。
蘇韻姿低調做「正印」,不料殺出「程咬金」?
蘇韻姿低調做「正印」,不料殺出「程咬金」?