反起跑線聯盟｜陳欣妍再被翻出舊照 當年豬膽鼻突消失 自爆曾經係肥妹仔

ViuTV劇集《反起跑線聯盟》正熱播，陳欣妍（Shirley）於劇中與Locker林家熙飾演一對年輕夫妻，首次出演人母角色嘅陳欣妍就成為話題，近日又再被網民再次翻出一張19歲舊照，被指面目全非。

陳欣妍早於入行前將社交平台舊照清空，但就喺ViuTV行山節目《美女郊遊遊》上位之際，網民翻出一張佢喺2013年參加銅鑼灣一個商場舉辦嘅代言人比賽照片。當年陳欣妍以真名陳曼姿參加，仲喺自我介紹中話自己係一個好鍾意幻想嘅人，不過當年嘅陳欣妍身材平平、膚色偏深，又面闊闊兼有豬膽鼻，可以話同而家個五官標致女神樣差好遠。陳欣妍就自爆自己曾經係一個體重高達62kg嘅肥妹仔，仲解釋後來因患有家族遺傳嘅甲狀腺問題而暴瘦20kg，瘦到面頰都凹晒，就連佢自己都覺得恐怖；另外，陳欣妍表示呢個病仲令佢成日出現心悸徵狀。

對於病情，陳欣妍抱樂觀心態，認為只要按時食藥及保持運動習慣就能控制病情，故此陳欣妍近年愛上健身，與男友沈震軒嘅獨立屋愛巢仲有個私人健身室可以隨時做運動。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！