叠影狙擊｜周秀娜轉型做打女超吸睛 喊戲被激讚：成功轉型實力派

由周秀娜及黃宗澤主演嘅TVB台慶劇《叠影狙擊》已於周一（6日）開播，除咗係呢對CP第三度合作夠晒吸引，周秀娜更於劇中一人分飾兩角；短短播出兩集，周秀娜已於劇中有多場埋身肉搏、槍戰戲及三場喊戲，被觀眾激讚係實力派演員。

劇情講述新加坡特警魏曉晨（周秀娜飾）調查人口販賣案時發現一具被摘去心臟嘅女性屍體原來係自己嘅孿生妹妹梁曦（周秀娜飾），經新加坡技術部警長男友家明（方力申飾）協助下，成功解鎖梁曦手機及發現梁曦曾致電予自己求救，當發現梁曦嘅死疑似與職業殺手有關，魏曉晨誓要用妹妹身份到香港找出梁曦死亡真相。周秀娜於劇中先後迎戰職業殺手及神秘狙擊手，多場槍戰場口及凌空起飛腳動作都無難度。雖然周秀娜表示，首集打鬥場面因為未扮梁曦而唔使著高踭鞋拍打戲會順利啲，但從第二集見到，即使周秀娜著上長靴，跳入梁曦獨立屋大門時動作仍相當俐落，相信周秀娜嘅打女形象將會於接下來嘅集數愈來愈深刻。

另外，周秀娜於首集就迎來三場喊戲，分別係一出場發現妹妹梁曦屍體、與上司爭辯應否查案，以及與方力申自責無好好保護妹妹嘅劇情。周秀娜表示拍攝呢幾場喊戲時生人勿近，唔會同身邊啲人講笑，最深刻係與方力申嗰場喊戲，表示要好集中去諗同妹妹嘅回憶片段去幫助培養情緒，嗰日係拍得最攰同最痛。周秀娜於劇中又打又喊嘅表現獲網民大讚演得好好：「成功轉型實力派」、「估唔到你幾打得，角色有發揮。支持」、「台上1分鐘，台下10年功，默默耕耘」、「你知道你自己有幾叻嗎」、「一個眼神我就可以分得出邊個係家姐邊個係妹妹」、「第一集好緊張，娜姐好靚又打得！」、「娜姐啲喊戲幾掂喎」、「娜姐女神，好嘢」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！