台灣地震︱周杰倫報平安余思霆屋企冧櫃 蘇皓兒原機折返

【on.cc東網專訊】台灣花蓮今日（3日）發生7.5級地震，截至中午12點前強震致4死97傷，知名景點落石砸中多人，就連本港有市民亦感到震感！多位藝人就被今次地震波及，當中身在台灣嘅台灣天王周杰倫，就晒出光圈照，雖然咩都睇唔到，但係佢就打上「晃到不行」、「平安」，太太昆凌就簡單寫上「希望大家平安」嚟分別同大家報平安。

台灣歌手楊丞琳自爆嚇到唔敢繼續瞓覺，仲驚到連阿媽屋企都唔敢：「連去母親家的勇氣都沒有明明距離這麼近」並表示不停聽到救護車、消防車聲：「希望災情降到最低，大家都平安無恙」。被網友封為「地質學家」嘅炎亞綸，於地震後第一時間發文關切所有人：「大家還好嗎？」仲喺留言區爆粗口寫道﹕「MTxK」心情相當驚慌失措。

相反同樣身在台灣老家嘅前華姐余思霆，佢就晒出家中多個矮櫃倒塌、冧天花嘅凌亂照，留言：「家裏人都沒事 花蓮的老家有點小意外 但家人都安全 謝謝大家的關心 希望沒有傷亡」余思霆回覆東網指：「事發後第一時間喺手機群組打畀屋企人，佢哋都平安，屋企牆裂、好多櫃倒塌咗，好多傢俱壞咗！」

正身在台灣嘅藝人蘇麗珊，則上載室內相，指自己尋日先啱啱抵埗台灣即遇地震：「昨天晚上到了台北，第一次遇到地震，仲以為自己發緊夢，好似搭緊架船喺好大浪嘅海上面咁 書架上面啲嘢都搖到郁嚟郁去，之前仲好糾結要唔要自己住酒店，好在因為怕自己一個瞓搵咗間airbnb，房東係個媽媽，我仲喺床上面呆咗諗緊咩事佢即刻嗌我起身，我哋同佢隻狗狗攬埋一齊先無咁驚，希望在台灣的人都安全」。她接受東網訪問，表示今朝地震被搖醒，有冧樓的感覺，見到啲書郁來郁去，所有嘢都搖晃，當時腦內空白一遍，問自己係咪地震，接獲房東通知，大家相擁平安度過，事後有與朋友出去食飯，所有嘢正常，不會改行程，事關今次來參加戲劇班，有固定日數要上堂，希望大家安好。

身在台灣拍攝電影的藝人朱栢康（朱康）則表示，今早因為地震而從睡夢中驚醒：「喺台灣經歷咗人生遇過最大嘅地震，醒咗仲喺度諗地震喎，台灣有地震都正常，跟住繼續瞓喺床上面，完全無任何行動，直到地震一直都無停過（餘震），我先開始驚，覺得要起身，著番條褲，喺度諗點做，係咪要走出街，然後地震停咗，我就陸續收到台灣朋友短訊電話問有冇事，才知道今次地震原來咁強勁！」事後他亦有走到戶外，發覺市面狀況暫時一切正常。

受台灣地震影響，機管局今早表示兩班由香港前往日本沖繩那霸機場的航班需要折返，當中就有長腿女神蘇皓兒喺機上，佢晒出高空照，指自己要原機折返，平安要緊。她接受訪問時說：「原本呢幾日諗住去沖繩潛水，順便慶祝生日。但係搭飛機嗰陣時遇上海嘯警報，落唔到地，所以就原機折返。等所有警報撤除之後，就決定再出發。自己唔算太擔心，但係如果有任何警報再發出，都會留喺安全嘅地方。」

而馬來西亞女神林明禎則發文，為台灣集氣：「天佑台灣 希望大家都平安 剛得知台灣大地震，震央在花蓮，看到了好 多花蓮災情的畫面 天佑台灣，希望大家平安 大家要多加留意，一定小心」台灣歌手劉若英、新加坡歌王林俊傑（JJ）、林心如、小S（徐熙娣）、王力宏等都紛紛發文，呼籲大家要小心。

【更多影劇新聞詳情請上東網新聞】