叱咤我最喜愛的男女歌手組合投票展開 網民力谷尹光上台︰全民投光B！

商台「叱咤樂壇流行榜頒獎典禮」之中，由樂迷投選嘅我最喜愛的男、女歌手及組合大獎，本周展開第一輪投票。呢輪投票過後將會決出最高票數十強，預計將於下周展開另一輪投票決出最後5強，並再次由樂迷選出今年嘅我最喜愛的男、女歌手及組合。

雖然只係第一輪投票，但係今年投票氣氛已經熾熱起嚟。早前開紅館個唱嘅尹光，今年因為網友用佢嘅聲線研發「A.I尹光」翻唱姜濤嘅《Dear My Friend,》同林家謙《一人之境》而深受網友歡迎，人氣再次反彈。「光B」早前推出嘅新歌Dear Myself都搵「A.I尹光」合唱。而Dear Myself上個月打入903專業推介第16位，即使位置唔算高，但根據商台「叱咤樂壇流行榜頒獎典禮」嘅「我最喜愛的歌曲」同「我最喜愛的男歌手」機制，有歌上榜就可以入圍接受樂迷投票。尹光今年正式有份角逐「我最喜愛」大獎，而喺討論區、facebook以至多位網路作家，都已經發文出post力撐尹光，誓要將光B推上叱咤台！

MIRROR大熱之後，過去幾年「我最喜愛」大獎都由MIRROR成員姜濤同Anson Lo盧瀚霆包辦。過去3年嘅「我最喜愛的歌曲」全數由姜濤奪得（《蒙著嘴說愛你》、《Dear My Friend,》及《作品的說話》）。姜濤同時喺2020及2021年獲得「我最喜愛的男歌手」，Anson Lo盧瀚霆就喺去年挑戰成功。而過去2年「我最喜愛的男歌手」最後五強當中，都有4位MIRROR成員躋身其中。尹光假如成功突圍，將有望成為姜濤同Anson Lo勁敵！

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！