雅虎香港新聞 叱咤男歌手三甲爭持激烈 陳卓賢 陳柏宇 林家謙 MC張天賦邊個空手而回？
元旦舉行嘅商台「叱咤樂壇流行榜頒獎典禮2023」，以歌曲播放率計算嘅獎項雖然仲有半個月先正式截數，但今年男歌手獎競爭異常激烈，以冠軍歌數量計算至少有6位有望爭入三甲，當中包括MIRROR成員、近年三甲人選，仲有出道16年嘅歌手都加入戰團。
今年喺903專業推介擁有2首以上冠軍歌嘅男歌手計有－
陳卓賢 （3首 －再見 寧靜海 ／ 抱抱無尾熊 ／ 仍在 ）
陳柏宇 （3首 － 一人傍晚藝術館 ／ 令人期待的下集預告／日常事故劇場）
林家謙 （2首 － 怪我只敢做好人 ／ 流離者的海）
馮允謙 （2首 － 收到收到／尋找隱世巨聲）
MC張天賦（2首 － 世一／第二人格）
陳健安（2首 －仍然是那個少年／繼續繼續）
計冠軍歌的話，Ian陳卓賢同陳柏宇的確甚有優勢攻入三甲，而且二人另有2首上榜歌，甚至有望首度衝擊男歌手金獎。但其餘4位之中，林家謙2首冠軍歌以外另外仲有2首亞軍歌，加上上榜時間充足，同樣係爭金人物。MC張天賦亦係有2首冠軍歌另加3首打入頭5位上榜歌，而新歌《救命稻草》似乎甚為受DJ喜愛，至今已經2星期亞軍，播放率有望扳回一城，令形勢更加難料。
照以上數據睇，陳卓賢、陳柏宇、林家謙及MC張天賦最有機會爭奪男歌手金銀銅獎，不過即使陳柏宇以三冠成績表面上穩入三甲，但由於商台有自己另一套播放率計算方法，甚至同音樂討論區網民全年逐個電台節目統計播放率數字有出入，加上4位當中唯獨Jason未有喺今年參與商台拉闊音樂會，所以估計陳卓賢、林家謙及MC張天賦將有機會成為男歌手三甲。巧合嘅係三人同樣有派台歌仍在榜上，最後幾周嘅播放率將會影響終極賽果，但最有可能嘅情況會係林家謙再次奪金。
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
