叱咤2021︳從負評白雪公主走到金獎女歌手 鄭欣宜走過最難行的路

出道十年嘅鄭欣宜喺叱咤頒獎禮上首度贏得女歌手金獎,並且再度奪得「我最喜愛的女歌手」,台上佢表示為咗「歌手」呢個銜頭連扮魔人布歐都試過。

父母都係圈中人,欣宜自細就喺鎂光燈下成長,甚至手抱咁大就已經參與電影演出,4歲亦都同媽咪肥姐(沈殿霞)合唱歌曲。欣宜同肥姐一樣有圓潤身型,亦因此被網民攻擊。2002年,15歲嘅欣宜喺籌款SHOW上跳唱Britney Spears嘅 Oops I Did It Again,縱然努力表演仍然慘遭負評。

後來欣宜成為瘦身代言人,外型拍得住唔少女藝人,但18歲嘅佢喺《兒歌金曲頒獎典禮》演公主向吳卓羲獻吻一幕,再度成為惡搞對象,後來欣宜喺香港迪士尼樂園開幕禮上再演白雪公主,甚至令TVB收到過百宗投訴,認為「場面噁心」。

近年欣宜重提事件,認為自己當時處理得幾好,冇為事件在意,甚至反過來安慰父母。Joyce又慶幸因為有呢次經驗,而家唔會再被同類事情影響。

外界對欣宜嘅睇法,喺2008年肥姐逝世後出現改變。肥姐悼念會上,份屬世叔伯嘅鄧光榮上台聲討肥姐前夫鄭少秋無盡父親責任,欣宜得體回應希望大家專注於紀念肥姐,贏盡觀眾支持。其後欣宜開始有更多幕前演出機會,包括參演TVB處境劇《畢打自己人》等。

2010年,欣宜加盟何哲圖主理嘅星煥國際成為歌手,翌年出道並推出2張專輯,反應不俗,並奪得四大傳媒嘅新人獎。2016年嘅《女神》更將Joyce嘅歌唱事業推上高峰,囊括多項大獎,包括商台叱咤樂壇流行榜頒獎禮嘅「我最喜愛的歌曲」及「我最喜愛的女歌手」2項樂迷投選大獎。乘住《女神》氣勢,欣宜2018年更殺入紅館舉行首個個唱。

鄭欣宜
鄭欣宜

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!