吳嘉儀結婚4個月疑受委屈 IG出Story控訴：唔好講幸福喇 連抖抖氣都有困難

TVB遊戲節目《開心無敵獎門人》嘅新「獎老」吳嘉儀（阿七），喺今年8月下嫁圈外男友「豬仔」Leo，當時Leo表示會好好照顧佢，二人結婚至今差唔多四個月，估唔到婚姻已經疑似出現咗問題。喺噚日（3日），吳嘉儀好似受咗好大嘅委屈，喺IG Story出PO表示：「唔好講幸福喇，連抖抖氣都有困難」。

吳嘉儀喺IG Story連出兩個PO，分別係：「唔好講幸福喇，連抖抖氣都有困難。你要斤斤計較係你品德問題，唔好逼人順從你果（嗰）套。我洗自己賺嘅錢對自己的家人、朋友好有咩問題？最好我養埋你供埋樓但寫你名，個個星期叫我諗去邊，入場費、parking又唔想畀，我比ok呀，叫你揸機影張相就黑面hea撳，其實撳幾個制又唔駛錢嘅，駛唔駛咁嘅態度先？最嬲係：日日都對住啦，駛咩維繫感情呀?（態度輕佻）」

而另一Story則寫道：「I m not OK, but I can survive. #話我擺3枝送比家人嘅護膚品喺車後座會整花佢tesla座位d（啲）皮（已提出搵到任何𠝹花痕跡，我願意照價賠償），#每日被話蠢話麻煩話污糟100次 #又唔係未試過被改密碼鎖無家可歸 #又唔係未經歷過比人成衣櫃衫掟出大門 #要求認真反省其當欺凌作玩笑的性格問題。」

呢兩個Story出街後，雖然吳嘉儀冇指名道姓，不過憑住一句「日日都對住啦，駛咩維繫感情呀?」，令人猜測二人婚姻出現問題，矛頭疑似指向佢老公Leo。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！