吳浩康元宵開戶外騷 老婆郭思琳出PO力撐 網民：你旺夫啊

喺娛樂圈打滾20年嘅吳浩康（Deep），前年與「格鬥女神」郭思琳奉子成婚並誕下兒子「撐撐」，早前喺社交網站宣布離開英皇娛樂，佢而家除咗係獨立歌手及唱歌老師之外，仲到地盤工作賺錢養妻活兒。佢前晚元宵喺主題樂園舉行戶外演唱會《Deep Reborn Live 2024》，除咗獲得大批歌迷買飛入場支持之外，老婆郭思琳亦有到場支持。喺演唱會圓滿結束後，佢仲喺社交網站出PO力撐。

吳浩康相隔5年再開騷，老婆郭思琳到場支持，完騷後更出PO上載二人合照及表達對老公嘅支持，留言話：「陪你經歷過低潮失意，更加知道今天一切得來不易，今天的你令我更加欣賞你，不論是你的毅力、心態、做人處事，都有很多值得我學習的地方。開心你成為獨立歌手後這麼快便開演唱會，我知道只要你一上台，你的狀態一定會好起來的，因為你是神眷顧的兒子，尋晚場show超正，不止爆場，而且氣氛好好，全場大合唱感覺一定很爽吧！好好享受屬於你的舞台，我們就從這裡出發，他朝一日，紅館見。」

呢個PO一出，唔少網民紛紛留言支持，大讚旺夫及係好老婆，例如「唔係話同某人比較，但男人有個好老婆真係可以逆天改命」、「你睇吓有個好老婆命運爭幾遠？」、「你鐵定是旺夫了！」、「支持你們一家，加油」、「你旺夫啊」、「好老婆要珍惜」、「努力，加油，吳太是一位不可多得的賢內坐。」、「你旺夫吖」、「你哋以後會越嚟越好」及「祝福你們一家人永遠幸福快樂」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！