吳浩康拍片剖白打2份工日做17個鐘原因「收入跌到去20年嘅新低點」

去年係吳浩康Deep人生轉捩點，離開效力20年嘅英皇之外，仲轉行打工做地盤，但係因為一條日常生活紀錄短片，唔少網民都大讚Deep係能屈能伸真漢子。下個月Deep更加會舉行個人音樂會，似乎谷底反彈。

早前拍片分享地盤生活嘅吳浩康，尋日再上載新影片，但唔係地盤生活日常，而係剖白做地盤嘅原因。片中Deep以旁白提到「如果用一場拳賽嚟比喻嘅話，2023年嘅1至11月，我都係捱打嘅狀態。通咗關之後，成個香港都好似冇晒人咁，我做開嘅工作收入嚴重下滑，跌到去20年嘅新低點」。

做老豆冇耐嘅Deep於是開始搵兼職做，經朋友介紹下開始做搭建金屬棚架工作，起初只係喺亞洲博覽館、醫院後山護土牆、中環海濱演唱會場地開工。四個月前Deep更開始返地盤，一星期返足四到五日，每日早上6點出門，8點返到地盤，下午5點15收工，返到屋企有時仲要幫手煮飯，先至再去教唱歌班教到11點收工，然後第二日又「繼續輪迴」。

如是者過咗3個月，不過佢認為幾努力做都依然係捱打，直到12月1日Deep分享咗自己做地盤嘅短片，得到前所未有咁多嘅支持，形容係大逆轉。「再一次感謝大家，我客串嘅角色有人留意到；有人請我表演，有人願意睇我表演；有一套引以為傲嘅電影上畫，又有一套客串嘅電視劇出街；平安夜有job，地盤有工開；仲有機會同老婆飛去馬來西亞做倒數show唞幾日」。

不過到最後，Deep話已經捱到好殘，好驚自己會死，手上拎住護肝保健品，原來呢條係廣告片！而片段最尾，Deep都話會嘗試戒酒，keep住最佳狀態喺演唱會見大家。

雖然係廣告，但都有唔少人留言話感動，甚至大讚「呢個廣告係我咁耐以嚟睇得最舒服嘅一個」。同Deep曾經係英皇同事嘅Yumiko鄭希怡就話「好感動，原來係一個廣告」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！