告別文化館｜傳承流行文化 蕭芳芳迷你裙、哥哥高跟鞋登博物館 學者：兩岸四地獨有｜Yahoo

港府去年 12 月底向立法會提出，將香港科學館尖東現址改建為「國家發展成就館」，科學館則於香港文化博物館於沙田的現址重建，而文化博物館藏品則會在其他博物館重新整合和重置，有海外港人組織發起聯署譴責「殺館」。上月有報道指港府正考慮在維港兩岸覓尋地點增設「流行文化館」。

沙田文化博物館生死未卜，已計劃的展覽如期舉行，包括去年底開幕的「絕代芳華．梅艷芳」展覽。澳門出生、澳門大學傳播學系助理教授李展鵬為梅艷芳忠實粉絲，專程來港參觀展覽。

沙田文化博物館自 2000 年 12 月 17 日正式對外開放以來，李展鵬就是常客。文化館去年 3 月起舉行「繼續寵愛・張國榮紀念展」，他更帶同家人來港參觀，「我家姐係超級『哥哥』（張國榮）迷，爸爸同媽媽都鍾意張國榮、梅艷芳，嚟到見到原來又有粵曲、又有金庸，佢哋都睇得好開心」。

李為文化評論人，專門研究電影、城市及流行文化。他指，文化館的展覽有助補充其研究的背景資料，尤其是常設展館「瞧潮香港 60+」，由二次大戰後細數至 2000 年代初香港流行音樂、電影、電視和電台廣播節目的發展，「我對八十、九十年代熟悉，但六十、七十年代或者粵曲唔算好熟，例如入面展出蕭芳芳嘅迷你裙，你現場睇到就會知道當時（六、七十年代）已經有少少唔同嘅女性角色，發展到梅姐就再大膽啲，裡面嘅information（資訊）有好多珍貴嘅嘢，幫到我哋研究流行文化、電影嘅人」。

即使有關香港流行文化的資訊和圖片在網絡垂手可得，李仍然珍視博物館這片觀賞實物的空間。「瞧潮香港60+」部分展品包括張國榮於《跨越 97 演唱會》中穿著的紅色高跟鞋、許冠傑演唱會穿過的紅白藍膠袋圖案服裝等，「張國榮對鞋，大家都會睇過演唱會片段，但你去到現場睇到實物畀你嘅 impact（影響）好大，未必係得到啲咩新資訊，但你對張國榮嘅性別形象會有更深刻嘅了解」。

展示流行文化「係一件事嚟」

李展鵬曾於英國修讀傳媒與文化研究博士，當地有多個展示流行文化資產的博物館：V&A 博物館曾推出《David Bowie Is…》世界巡迴特展，創下開館以來最高觀展人次紀錄，及後更創立「大衛・鮑伊中心」，展出 8 萬件關於 David Bowie 的藏品；英國國家肖像館舉辦已故女星柯德莉夏萍（Audrey Hepburn）相展；英國利物蒲亦設有披頭四（Beatles）故事館，「我當時好羨慕，人哋會好珍而重之地去展示流行文化」。當見證沙田文化博物館成立，李展鵬雀躍非常，「佢哋成功經營到個品牌效應，入 museum（博物館）唔係淨係睇啲精緻藝術，兩岸四地（中港台澳）得香港呢個展館，係咁認真、嚴肅疏理流行文化」。

行政長官李家超於 2022 年《施政報告》表明港府銳意推動文化發展，康樂及文化事務署去年更推出「香港流行文化節」。李展鵬指，港人日漸珍視流行文化，對港府下「殺館令」感到驚訝，「你有一個展館去做呢樣嘢，其實係一件事嚟，係一個態度話畀人聽，香港有好重要嘅文化legacy（傳承），要有公眾資源、軟件硬件嘅設施去present（展示）呢啲嘢」。

文化體育及旅遊局長楊潤雄書面回覆立法會議員質詢時曾表示，文化博物館 2022 至 2023 年度赤字達 1.26 億元。李展鵬則認為，文化館長遠可為香港帶來經濟收益，「假設梅姐大陸、日本 fans 嚟睇，就係旅遊業好重要嘅元素，等於去日本我哋會去吉卜力（美術館）一樣。邊度有錢邊度都可以放到煙花，但呢啲嘢就係要嚟香港睇」。文化館於去年舉辦為期半年的「繼續寵愛・張國榮紀念展」，吸引逾 37 萬人次入場。

以嶄新方式探索當代藝術 藝術家：咁多個館之中最好嘅展覽

文化博物館 2015 年舉辦「時間遊人」展覽，邀請 18 位當代藝術家以作品回應館內的常設展品，本地混合媒介藝術家鄧國騫是其中之一。鄧國騫為原居民，收集爺爺珍藏多年的遺物，以錄像、混合媒介製成作品《鄧爺爺》，在整理物件過程中，他與觀眾一同追尋祖先和爺爺的生活軌跡，「可能係尋求緊一種跟唔同時代、時間嘅 dialogue（對話），係我作品上常常會有嘅嘢」。

鄧指，文化博物館素來會邀請不同策展人籌備展覽。他參展那段時間，部份來自中大藝術系的策展人加入文化館，令該館除了流行文化的常設館外，部份展覽開始以新方式探索當代藝術，「嗰時我覺得（文化館）係咁多個館入面，展示當代藝術最好嘅展覽」。其時大館、M+ 等博物館尚未誕生，他認為香港藝術館的定位與觀眾較遠，「藝術館嘗試接軌大眾多啲，放咗好多力氣喺 package（包裝）嘅嘢，唔係藝術本身；但文化館無呢樣嘢要 deal with（處理），佢本身已經有大眾生活文化嘅嘢，pop culture（流行文化）又好、設計又好，佢要同觀眾接軌唔需要花額外嘅力氣」。

近年，文化館的展覽較著重流行文化，鄧國騫認為這是記錄、書寫和疏理文化的重要媒介，「假設 Mirror 突然間唔紅，可以話消失就消失，但佢喺香港流行文化嘅歷史定位係咩呢？如果無呢啲展覽、無整理過程，唔去講嗰樣嘢，文化係無活力承傳落去，都會消失」。他建議當局不應「殺館」，更應考慮翻新文化館，包括善用展覽空間和改善觀眾觀展路線。