周家蔚拍片指囝囝生得高靠飲湯惹爭議 網民：你不說說洪天明多高

當大家講起周家蔚嘅時候會諗起啲咩呢？除咗諗起佢老公洪天明曾經喺《獎門人》贏得2萬多件花之戀壽司之外，仲有就係佢哋嘅幸福之家。2006年港姐亞軍兼最上鏡小姐周家蔚（Janet）與洪天明結婚10年，婚後二人育有9歲大仔洪大仁及6歲細仔洪竟稀，周家蔚亦退出幕前，專心相夫教子。近年佢轉型做星級媽媽KOL，不時喺社交網站與網民分享日常生活及煮食心得。日前佢就教大家煲湯，不過就惹嚟網民批評。

日前，周家蔚好似平時咁上載影片教大家煲湯，佢喺片頭表示只要分享囝囝生得高嘅秘訣：「很多人都說，我兩個兒子都長得高，那就是因為呢，我會弄這個湯給他們喝。」之後，佢就介紹煲湯嘅材料及程序，再之後就見到佢囝囝喺度飲湯，周家蔚就同囝囝講飲咗呢個湯就會生得更高，仲問佢要有幾高，囝囝就回答話佢生到兩米咁高。

影片出街後，唔少網民都對呢個湯抱有懷疑嘅態度，因為佢哋認為一個人嘅高度係由基因所決定，而唔關飲湯事，留言話： 「大佬 洪天明186啊 我信你啲湯？」、「哈哈哈，兩公婆都高！」、「那是父母都高」、「基因就那麼高啊」、「主要是基因，跟湯的原因不大」、「主要還是遺傳父親」、「兒子長得很高，你不說說洪天明多高」及「父母本來很高......」等等。而周家蔚亦有留言解釋指有個別例子：「說到基因 那身邊確實很多正正得負、負負得正的真實例子，所以媽媽們要用心呵護孩子成長。」

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！