周末性趣：女人必睇 男人口中不戴套的5個理由

戴套與否，好似係一個好簡單嘅問題，但好多時男士們往往有好多借口推三推四，而女士明明想對方戴但又唔好意思開口，驚破壞氣氛，又驚破壞大家關係，所以可能自己暗暗擔心但又唔知點做。一個外國網絡《Women’s Health》最近就歸納列岀五個男士唔想戴套時最常用嘅藉口，姐妹們快啲睇下佢係咪都係咁同你講。

1. 我好乾淨？
大家要搞清楚，乾唔乾淨同會唔會大肚係兩回事，而且乾唔乾淨，係無任何證據之下，都係得個講姐，唔係話唔信，但好多性病初期唔會有好明顯嘅症狀，所以如果唔係無檢查之下根本好難確定。

2. 我頂唔順啦
好多時情到濃時，男士都會用呢句做藉口，唔想拖延時間想馬上轉入直路，有時佢哋仲會講好多甜言蜜語。呢個時候最緊要保持冷靜，諗清楚如果一個唔小心無戴套之後有咗又或者感染到性病，相信你就會做到正確嘅選擇。

3. 唔戴舒服啲
呢個可以話係最老土，亦都係好多男士會選擇用嘅藉口，不過唔講唔知原來好多調查顯示無論係男定女覺得其實戴套係更加舒服，因為一嚟可以減低擔心患上性病同懷孕，而且依家嘅condom 五花八門，有厚薄，又有花紋同香味，分分鐘令你爽上加爽。

4. 動之以情
如果你嘅另一半鍾意直接問你，可能係想動之以情等你覺得唔戴都可以，呢個時候記得要把緊關口，直接講清楚你嘅諗法。當然，講岀口都可以有好多方法，最緊要揾到一個唔會令對方太難堪又可以講到自己意願嘅方法。

5. 信任大於一切？
有啲男士好鍾意用信任嚟遊說對方，覺得女方係岀於唔信任先想佢戴套，不過姐妹們要記得，信唔信任同戴唔戴套係無直接關係，除非你地已經好有共識即使懷孕都係可以負上責任，否則請唔好衝動行事。

講到尾，其實大部分男士都係因為想自己爽啲，所以姐妹們不妨係屋企床頭櫃又或者一啲隨身袋到未雨綢繆，以備不時之需。

相片來源：hirocu1y ， puipuiblog ＠tumblr