周潤發談香港電影處境︰97年後事情有變 要留意政府方向

周潤發出席韓國釜山國際電影節，接受大會頒發嘅「亞洲電影人獎」。星期四大會舉行記者會，發哥大談電影生涯及分享個人睇法。席間發哥盛讚韓片好睇，因為題材好廣闊，又認為韓國電影有政府支持，自由度好大，所以創作人思想好闊，甚至有好多令發哥覺得驚訝嘅題材，「佢地夠膽拍呢啲喎」。

發哥又用英文表達佢眼中中國電影嘅現況，表示內地有好多審查嘅要求，大部分劇本都要被唔同部門審批，因此一定要直接同清晰咁掌握劇本情況。發哥認為現時面臨唔少限制，對電影導演而言係艱難時期。

不過發哥表明會盡最大努力，去製作具有香港精神嘅電影，並以此為目標。發哥知道港片80年代喺南韓有好多人睇，不過到1997年後事情有變，要留意政府指令，否則難以得到資金。

港片曾經喺南韓大受歡迎，但而家韓片有本事走出國際，周潤發覺得每一個地域都有佢嘅「國運」，到某段時間加上一啲因素，一個地方嘅電影不能前進係應有原因。到有人承傳香港電影知識再發揚光大、走得更遠，令發哥為韓國電影工業感到鼓舞。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！