雅虎香港新聞 
唐詩詠做兄弟搶晒鏡 女星反串西裝一樣型
早前林子善大婚，兄弟團除了有馬國明、鄭嘉穎等型男，反串做兄弟的唐詩詠尤其搶鏡！無他，詩詠一身灰格三件頭西裝，英氣十足！其實，西裝從來就唔係男生們的專利，其實都有唔少女星做過兄弟、或者著起西裝作型格打扮，一齊睇睇！
撰文：東方新地｜圖片：新傳媒圖片庫、instagram
延伸閱讀：
唐詩詠做兄弟搶晒鏡
林子善日前與太太董佩欣舉行婚宴，擺足63圍，出席賓客星光熠熠，連兄弟團亦非常有份量！有鄭嘉穎、馬國明及袁偉豪等型男，但通通都唔及反串兄弟的唐詩詠搶鏡！
第一次反串兄弟的詩詠呢日身穿灰格三件頭西裝，襯一雙白色短靴，為靚女詩詠添上一份帥氣，難怪網民見到後紛紛留言，好想要個咁索的「兄弟」！
李靜儀(Heidi)
其實，女仔做「戥穿石」唔係咩新鮮事，唔只唐詩詠，Super Girls成員李靜儀(Heidi) 早排參加朋友婚事時，就著上全身黑西裝兼打埋黑呔，勁有中性美，黑白色配襯嘅造型更顯型格，成個氣場都即刻強哂！
衛蘭
大家唔好以為得反串兄弟先著得西裝，其實王君馨大婚當日，做姊妹的衛蘭就有作西裝打扮，成為姊妹團中唯一著西裝的成員。順帶一提，衛蘭著住套銀灰色西裝，除咗有啲顯瘦效果，仲喺姊妹團入面幾突出！
Robynn & Kendy
歌手林奕匡早前補擺喜酒，邀請組合Robynn & Kendy兩個女生做兄弟，見到Robyn恤衫打呔，配上馬甲同尖頭紳士鞋，成個造型完全不輸男生，仲要單手插袋自拍，帥氣度爆燈！
龔嘉欣
細細粒女仔原來著西裝一樣好睇！龔嘉欣就係一個好例子。本身個子小及瘦削嘅龔嘉欣著上啡色西裝外套再配黑色下裝同尖頭高跟鞋，中性同知性美兩者同時結合，一樣適合女生，再襯上襟花嘅龔嘉欣就仍然不減甜美～靚呀～
Emma Watson
外國方面，當然都有知名女明星試過著住西裝出席大小活動，就好似大家好熟悉的「妙麗」Emma Watson咁，有時都喜歡以西裝形象示人，不但給人一點硬朗的感覺，而且利落之餘又不失時尚感！
Dakota Johnson
另外，自問個人衣著比較大膽又喜歡性感打扮的話，或者可以參考一下憑《格雷的五十道陰影》爆紅的Dakota Johnson，睇佢衣著攞攞靈感。未必需要學佢真空的著法，但絕對可以選擇一啲修身剪裁的西裝款式，女人味大增外，仲可以增添多分性感美！
