唐詩詠突施撩陰腿 陳展鵬險被拆祠堂：我仲想生多個

視帝陳展鵬昨日出席活動，與視后唐詩詠玩遊戲時，女方突然施展撩陰腿，他險些被「拆祠堂」，嚇得以想生B為由，叫詩詠睇準踢。事後他笑言被女兒催生B，女兒更戲言父母唔生，惟有由她上場，令他哭笑不得!

陳展鵬、唐詩詠、陳山聰、劉穎鏇（Tiffany）與劉佩玥等昨日宣傳無綫台慶劇《超能使者》，期間眾人玩遊戲，詩詠被要求踢展鵬小腿上5吋下5吋位置，惟她險些踢中「小展鵬」，展鵬見狀即說：「同我踢準啲，我仲想生多個！」

早前離港4個月到內地拍劇的展鵬坦言很想念香港，幸好有太太與女兒同行：「同屋企人去咗好多地方玩，個女都長大好多。之前喺香港，因為工作關係反而陪個女時間比較少，但今次對住個女時間比較長，覺得佢真係大個咗。（今次冇女傭姐姐一齊去，太太好辛苦？ ）佢完全搞得掂，直頭要加佢人工，啲錢全部入晒佢戶口！」談到剛才玩遊戲時稱想生B，他說：「真係要生多個都冇問題，我依家仲後生嘛！其實個女都話要多個BB，仲話如果我哋唔生就佢自己生，我聽到都嚇一跳，要睇實佢，唔係到10幾歲仲得了！」

已跟無綫約滿的詩詠，早前在社交網分享泳裝照派福利，她表示回復自由身後心情舒暢，但只限肚兜泳衣，未能像Tiffany於劇中穿三點式般性感。她又透露正籌備舞台劇：「我只係寫大綱，正式寫劇本仲需要時間學習。（想做才女？）唔敢諗啦！（之後會幫無綫宣傳劇集？）時間許可會出席，我仲有套《隱形戰隊》未出街。」

陳山聰苦練新移民口音

連續播出兩套台慶劇的山聰，被問是否準備做視帝？他笑言：「表格都未有，到時入咗5強先再問啦！」又稱今次演新移民，開拍前花了數月練習口音：「嗰時日日去食米線，去聽啲阿姐講嘢口音，我亦要多謝太太，嗰段時間用番嗰個Tone同我講嘢。」被讚是「最強Body」的Tiffany表示看到宣傳片感尷尬：「仲要喺咁大個螢幕度播，應該係選港姐之後第一次着泳衣。」