喪父兼失戀 ToNick主音趙善恆自爆抑鬱一年「爭啲想走」 網民鬧爆恆仔前度譚杏藍

憑《長相廝守》而成名嘅樂隊ToNick，主音趙善恆（恆仔）玩音樂之外亦係導演兼演員，曾執導電影《夠殭清道夫》及主演ViuTV劇《和解在後》。去年2月，恆仔同拍拖十年嘅KOL女友譚杏藍（小花）公開宣布分手，之後見到恆仔不時上載跑步相，似乎走出情傷。但恆仔尋日喺IG發千字文，坦承去年面對喪父兼失戀後「抑鬱咗一年 爭啲想走」。

恆仔發文之後，唔少圈中好友都有留言打氣，周國賢更力撐兄弟「唔好放棄，我會陪你一齊行」。

不過恆仔個post提到「分咗手之後／當每一個人關心問我點／佢哋都會不經意咁講一句：原來你乜都唔知㗎？／然後我就會聽到一個新嘅人名」，令唔少網民聯想到恆仔前度譚杏藍係咪有「派帽」（出軌），仲走去小花IG留言鬧爆。

小花同恆仔分手大約半年後，喺去年9月公開新戀情，新男友Ronald被揭係Youtuber小影（黃亦禧）嘅前度，而Ronald同小影甚至曾經訂婚，而小花同Ronald公布拍拖之前，亦曾經同小影拍過YOUTUBE片，關係七國咁亂。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！