回應圓方工業意外 陳國基：相信任何人都會一世唔安樂

兩名工人前日（23 日）維修尖沙嘴商場圓方冷氣系統期間懷疑吸入沼氣死亡，意外後無人發現，至昨日才在地底管道內找回死者。署理行政司官陳國基今午（25 日）見記者回應事件，他質疑「呢啲意外究竟係咪真係意外」？對於兩人死亡，他相信「任何人個心亦都會一世唔安樂」。

「工業意外係咪真係意外？」

陳國基指出，如果承辦商跟足法例進行工程，今次奪命意外不會發生。因此，他質疑事件並非意外：「其實呢，呢啲工業意外呢，究竟係咪真係意外？抑或係由於人為疏忽，有人唔依指引，甚至不依法例而造成㗎呢？好似噚日嗰單 case 為例，我哋睇到，到目前為止，係冇證據證明到個承辦商係有依照法例下面規定啲嘢去做。」

他解釋，根據法例，承辦商需要委聘合資格人士對工程進行風險評估，並將評估報告擺放在工作地點當眼地方，工人亦須接受過適當訓練，及配備適合保護裝置。

陳國基形容事件非常之嚴重，「導致兩名人士犧牲咗，更加係永遠、永久性咁傷害咗兩個家庭」。他表示已指示警方循刑責方面調查，警方亦已經委派重案組調查案件，兩名承辦商職員被帶返警署落案。勞工處正巡查同其他密閉空間地盤，若發現有承辦商不依法施工，將嚴厲執法。

兩個受影響家庭各獲五十萬元緊急援助，陳國基稱：「生命好寶貴嘅，喪失咗兩條生命，我相信任何人嗰個心亦都會一世都唔安樂。」