【回顧2020．娛樂】細數今年10位成功上位男星 顧定軒／張松枝／魏浚笙／朱敏瀚…

2020年就嚟完結，之前就同大家回顧咗今年10位成功上位女星，今日當然輪到10成功上位男星啦！其實今年唔少男星都憑住努力及出色演出，成功跑出獲得觀眾肯定，例如顧定軒、劉俊謙、張松枝及朱敏瀚等等，仲有邊幾位？而家就同大家一齊回顧一下啦！

顧定軒
被視為影壇新貴嘅顧定軒（Zeno），14年參與電影《愛．尋．迷》入行，之後參與過唔少電影拍攝，上年更有機會與郭富城合作拍攝《麥路人》。喺劇集方面，佢都有唔少演出機會，例如香港電視《大眾情性》、RTHK《火速救兵IV》、無綫《那些我愛過的人》及正在熱播中嘅ViuTV《男排女將》。顧定軒憑《那些我愛過的人》飾演朱嘉炳一角，成功獲得關注，人氣急升。熱愛演藝工作嘅顧定軒，今年仲參加咗《全民造星III》，喺面試時話唔想淨係用演戲同觀眾接觸，希望透過音樂俾大家認識真正嘅佢。賽前人氣最高嘅佢，唔知有冇機會殺入10強呢？

劉俊謙
32歲嘅劉俊謙（Terrance）高大靚仔，係唔少女士心目中嘅男神。演藝學院畢業後，佢演過唔少舞台劇，當中憑《天邊外》奪得「第九屆香港小劇場」最佳男主角。4年前劉俊謙轉戰影視圈，上年憑ViuTV劇集《教束》盧Sir一角備受注意，獲網友票選為「民選視帝」。今年喺《二月廿九》飾演「會長」余家聰一角同樣得到觀眾喜愛。另外，佢今年於港產電影《幻愛》首次擔正做男主角，演技令人眼前一亮，獲得多個獎項，當中包括《第26屆香港電影評論學會大獎》最佳男演員，今年佢可以話係影視雙贏呀！

強尼
曾任工程師嘅ViuTV藝人強尼（許博文），無論係演戲、主持、足球評論員定係唱歌都冇嘢難到佢，所以有「全能強尼」之稱。早前強尼更霸佔ViuTV三個黃金時段，包括《暖男爸爸》中飾演Lantau及為《全民造星III》和《晚吹：有酒今晩吹》擔任主持，成功入屋。

魏浚笙（Jeffrey）
ViuTV真人騷《調教你男友》喺7月播出時，掀起全城熱話，參加者魏浚笙（Jeffrey）憑養眼外表及對女友深情舉動一夜爆紅，IG粉絲暴增，人氣急升嘅Jeffrey更被網民封為「翻版陳冠希」。現年22歲嘅Jeffrey，喺17歲嘅時候就已經入行做模特兒，仲拍過唔少廣告及品牌活動都有佢蹤影。現時佢仲喺一名學生，於公開大學修讀BBA，至於會唔會簽公司做藝人，Jeffrey就話完成學業先再考慮。

張松枝
現年53歲嘅張松枝，過往喺無綫經常飾演奸角及二世祖角色，所以有「御用二世祖」嘅稱號。有感不受重用嘅張松枝，2012年離巢向外闖。今年憑《二月廿九》飾演辰叔一角備受網民關注，大讚佢演技非常精湛、頭髮斑白佬味十足，仲話張松枝好似孔劉添呀！其實除咗《二月廿九》之外，佢今年仲有其他作品出街，包括《熟女強人》、《黑市》及綜藝節目《中佬唔易做》。

韋家雄
「綠葉王」韋家雄入行超過30年，演技毋庸置疑，不過多年嚟都係飾演配角。今年佢終憑劇集《木棘証人》升呢做男二，佢飾演嘅「帆哥」李浩帆係一個好執著同患有強迫症嘅人。佢嘅表現絕對冇令大家失望，唔少網民睇完佢嘅演出後，紛紛留言大讚佢演得好好、勁搶鏡及直頭似男一等等。

鄭中基
ViuTV劇集《暖男爸爸》劇情溫馨及對白貼地，劇集播出後好評如潮，連帶相隔18年再度拍劇嘅鄭中基（Ronald）人氣再度急升。佢喺劇中飾演嘅獨力照顧囝囝暴龍哥嘅林世榮，成功感動無數觀眾。鄭中基更憑劇集主題曲《My Only One》殺入《2020叱咤樂壇流行榜頒獎典禮》「我最喜愛的男歌手」最後5強。

朱敏瀚
現年28歲嘅朱敏瀚（Brian），中五畢業後投考藝員訓練班，多年嚟經常飾演某角色嘅「年輕版」及細佬，所以有「萬年細佬」之稱。幾年前佢開始操練肌肉，誓要撇去潺弱形象，事業亦因此有起息，今年無綫播出嘅劇集，佢有份參演嘅已經有6套，當中憑《反黑路人甲》「金牌打手」陸秋獲得觀眾關注，成功上位。

柳應廷（Jer）
香港男團MIRROR人氣爆燈，姜濤及Ian喺上年已經分別推出Solo歌曲，今年就有另外3位成員單飛推出solo新歌，當中包括柳應廷（Jer）。佢喺參加《全民造星》時30強止步，後來得到花姐賞識而加入MIRROR，今年Jer以「物語系列」推出咗3首作品，歌曲，次部曲《迴光物語》除咗成為「Chill Club推介榜」冠軍之外，更得到「903專業推介」冠軍，被視為樂壇新人獎三甲大熱。

江𤒹生（Anson Kong）
今年MIRROR成員除咗Jer單飛闖樂壇之外，副隊長江𤒹生（Anson Kong）亦有出solo歌，分別有《特登》、《千億個或許》、《蝸牛》及《金星女孩》，反應不俗，令佢同樣被視為樂壇新人獎大熱。另外，佢亦有參演劇集，喺以空手道為主題嘅《打天下》中飾演小混混關志浩，有唔少拳拳到肉嘅動作場面。

按此下載全新應用程式Yahoo APP，並以Yahoo電郵免費登記成為會員，即時可完成簡單任務賺取Ypoints，憑分即可換領不同獎賞！ 新人更可即時換領限量新人禮，立即下載！