回顧2022.娛樂|細數十大印象深刻TVB螢幕情侶 林盛斌劉佩玥被喻為「本年度最好睇CP」

 回顧2022.娛樂|細數十大印象深刻TVB螢幕情侶 林盛斌劉佩玥被喻為「本年度最好睇CP」
回顧2022.娛樂|細數十大印象深刻TVB螢幕情侶 林盛斌劉佩玥被喻為「本年度最好睇CP」

TVB今年推出唔少好評劇集,不過煲劇嗰陣劇情重要之外,男女主角甚至男女配角嘅互動都好重要;而家就同大家盤點一下今年10對令人印象深刻嘅劇集CP啦!你又最想睇到邊對再一齊拍劇?

《美麗戰場》林盛斌&劉佩玥
林盛斌於劇中飾演富豪徐富貴,對靜兒(劉佩玥飾)早有好感,劉佩玥於採訪林盛斌期間更發現佢並唔係外界睇起上嚟咁無情,之後每次劉佩玥心情唔好,甚至被鍾家寶(陳瀅飾)出賣險坐監,林盛斌都四處幫劉佩玥求情,有情有義。二人感情線起初不被觀眾睇好,但播吓播吓,觀眾就被林盛斌嘅深情感動,更大讚係「本年度最好睇CP」,播映完畢後林盛斌和劉佩玥更頻頻合體出席活動搵真銀。

《美麗戰場》林盛斌&劉佩玥
《美麗戰場》林盛斌&劉佩玥

《下流上車族》林敏驄&江美儀
林敏驄與江美儀飾演夫妻,江美儀為一家人可以上車,要林敏驄一出糧就要上繳,控制慾甚強,不過林敏驄都心甘命抵。直至日語學校校長Peggy(黃嘉雯飾)出現,令林敏驄和江美儀婚姻面臨重大危機,及後一場公園真情剖白戲令網民激讚二人好戲,可以由短短五分鐘內演於互相怪責、自責到後悔嘅情感。而其實,林敏驄和江美儀係首次合作,當初江美儀曾擔心一向搞怪嘅林敏驄正經演出會否令大家冧檔,點知佢就話林敏驄拍劇時都經常臨場創作新台詞,好在自己都接到。

《下流上車族》劇照
《下流上車族》劇照

《金宵大廈2》陳山聰&李施嬅
《金宵大廈2》採用《金宵大廈》原班人馬作主要演出,播出前已令觀眾大感期待,陳山聰和李施嬅於續集中一人分飾多角,陳山聰分別演出60年代精神病人、原世界中嘅冷漠Maurice,以及另一平行時空失憶暖男Joey;李施嬅則一人分飾四角,包括《金宵大廈》Coco姐、精神病院醫生、冷漠強悍嘅Lydia及感性柔弱嘅Ella,大玩平行時空戀愛。

《金宵大廈2》劇照
《金宵大廈2》劇照

《白色強人II》郭晉安&張曦雯
郭晉安於《白色強人II》飾演YT,與呂靄寧(張曦雯飾)從上司下屬發展成戀人關係,張曦雯於YT推行醫改方案期間一直在旁支持,直至最後郭晉安患有腦腫瘤,張曦雯都無放棄對方,仲決定親手為郭晉安做開腦手術將腫瘤割除,即使成套劇都無咩親密場面,但都睇到一眾觀眾眼濕濕。

《白色強人II》劇照
《白色強人II》劇照

《超能使者》陳山聰&劉穎鏇
陳山聰與劉穎鏇呢對組合夠晒新鮮,其中一次Open姐(劉穎鏇飾)親身到餐廳通知高勇(陳山聰飾),Icy(葉蒨文飾)因工作而放飛機,陳山聰著劉穎鏇坐低陪佢食埋餐飯,唔熟悉西餐禮儀嘅陳山聰卻與劉穎鏇食得好開心。其後,陳山聰與葉蒨文分手後變得心不在焉,劉穎鏇希望幫助對方走出失戀陰影,點知於意外被困凍櫃車內時擦出愛火。陳山聰與劉穎鏇呢對CP由歡喜冤家做到情侶,觀眾都覺得好甜蜜,而二人亦會於新劇《隱形戰隊》飾演一對,未知屆時觀眾又滿唔滿意佢哋表現?

《超能使者》劇照
《超能使者》劇照

《青春不要臉》丁子朗 & 戴祖儀
溫楚瑜(戴祖儀飾)和齊輕舟(丁子朗飾)為藝訓班同學,之後發展成情侶,仲有唔少親熱戲,大玩女上男下激吻。丁子朗一次因替女友出頭打人而被劇組列入黑名單,最終由柳德榮(余德丞飾)介紹進入兒童組,即使收入不俗,但每日行屍走肉,最後戴祖儀拒絕丁子朗求婚,仲提出分手,互相揭大家嘅瘡疤,睇到觀眾個心嗱住嗱住。

《青春不要臉》劇照
《青春不要臉》劇照

《食腦喪B》何廣沛 & 江嘉敏
《食腦喪B》由何廣沛、江嘉敏擔任男女主角,其實二人過往5年早已合作多次,包括《親親我好媽》、《大醬園》、《陀槍師姐2021》,江嘉敏直言呢5年彼此成長咗好多,何廣沛對佢更加照顧有加,合作起上嚟好有親切感和默契,已經唔需要花時間磨合,呢次合作比5年前作品《親親我好媽》更多火花。

《食腦喪B》劇照
《食腦喪B》劇照

《痞子殿下》周嘉洛 & 陳瀅
陳瀅與周嘉洛首次合作,陳瀅直認當初接拍此劇時曾非常抗拒與周嘉洛演情侶,因為擔心對方年紀比作細,會溝通唔到。二人於劇中飾演廢柴王子紀威和歌蓮神國公主納克溫柔,係一對歡喜冤家,互相以不同方式毆打對方,陳瀅之後都坦言愈拍愈有火花,不過就否認緋聞。

《痞子殿下》劇照
《痞子殿下》劇照

《鐵拳英雄》陳展鵬 & 唐詩詠
錢芊芊(唐詩詠飾)於《鐵拳英雄》結局篇前嘅武打場面都唔算多,反而集中於與青雲(陳展鵬飾)嘅感情線。唐詩詠於劇中用八卦掌救出陳展鵬,及後因不斷搵陳展鵬陪佢練功而萌生愛意,迫陳展鵬承認喜歡自己,亦係劇中一大看點。

《鐵拳英雄》劇照
《鐵拳英雄》劇照

《法證先鋒V》黃宗澤 & 王敏奕
余星柏(黃宗澤飾)慢熱寡言,但霍寶英(王敏奕飾)就被佢認真工作嘅魅力迷倒,主動向對方示愛。即使被拒絕,仍未放棄提出緣分遊戲,上演一段女追男戀曲;而之後蔣怡會於小丑案中介入黃宗澤與王敏奕之間,感情線大亂。黃宗澤與王敏奕於劇中無太多嘅親熱戲,黃宗澤笑言可能有保護家嫂機制,所以連一個錫嘅鏡頭都冇。

《法證先鋒V》截圖
《法證先鋒V》截圖

按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可換領限量新人禮,立即下載!