國泰特設MIRROR專屬歌單 但係冇AK Alton Ian Jeremy個人單曲引鏡粉不滿

而家世界復常，唔少人都開始坐飛機出外玩。國泰航空早前宣布機上娛樂系統將會提供MIRROR有份嘅電影、電視劇、綜藝節目以至歌單，簡直可以由上機到落機全程陪住鏡粉。不過有鏡粉見到國泰嘅歌單上，歌曲分配相當唔平均，引起佢地討論。

國泰嘅MIRROR歌單一共有23首歌，分別係4首團歌，姜濤、Anson Lo（盧瀚霆）及Edan（呂爵安）各有3首半歌曲。（合唱歌包括姜濤 x Anson Lo嘅《愛不作聲》、姜濤同ERROR肥仔嘅《特務肥姜2.0》同埋Anson Lo與Edan嘅《突如其來的心跳感覺》。）最多歌嘅係阿Jer（柳應廷），歌單上獨佔7首單飛作品。同樣有個人作品嘅AK（江𤒹生）、 Alton（王智德）、Ian（陳卓賢）、Jeremy（李駿傑），以及AK合唱嘅隊長Lokman（楊樂文）都未有歌曲揀入歌單。

除此之外，揀選嘅曲目亦有所不足，受歡迎程度相當高嘅歌曲，例如Edan嘅《E先生連環不幸事件》、Anson Lo嘅《Megahit》以至團歌《Ignited》等都冇份。而英文版歌單用國語拼音顯示歌名，亦令fans不滿。有鏡粉認為MIRROR所屬公司MakerVille搞分化，而且唔尊重個別單飛成員。

《Yahoo 新聞》已就事件向國泰查詢，正待回覆。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！