國際選美香港代表民族服裝 成籠點心咁款 呢位佳麗學歷幾勁

以往TVB選出嘅香港小姐會有機會出外參加國際選美大賽，最勁係1987年楊寶玲參加環球小姐得過第5名。近年TVB冇派代表出賽，但原來仲有國際選美比賽搵香港靚女鬥靚。

最近喺泰國舉行嘅「國際萬國小姐」（Miss Grand International)，剛剛進行咗民俗服裝環節，香港代表Sen Yang嘅造型十分別緻，係一籠點心咁款！最妙係條裙入面真係有點心，而Sen喺台上更即席食燒賣俾觀眾睇。

雖則其他佳麗套民族服裝都係浮誇系，不過對比之下香港嗰籠「點心」華麗不足騎呢有餘。而且支區旗完全唔符合法例規格，會唔會犯咗法？

睇返官網介紹，香港代表Sen Yang今年26歲，身高171cm，職業係模特兒、公民社會工作者同學生。Sen學歷幾勁，喺英國格拉斯哥大學修讀人權及平等碩士課程，志願係建立公民社會，提升大眾對人權嘅認知。不過介紹裡面冇提到佢係咪香港出世或者喺香港住咗幾耐。

今屆「國際萬國小姐」有61位佳麗參加，星期四會舉行初賽，星期六就係決賽大日子。唔知Sen會唔會憑呢套點心look「為港爭光」？

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！