雅虎香港新聞 圓規襲港｜打風留喺屋企有咩做？ 精選近期6大hit爆劇集俾你解悶
熱帶氣旋「圓規」襲港，八號東北烈風或暴風信號現正生效，各位打工仔難得有一日「風假」可以抖抖，但係留喺屋企又覺得悶？不如煲劇輕鬆一下啦！而家就睇下近期有啲咩大熱劇集，但大家可以煲劇解悶，消磨一下時間。
《魷魚遊戲》
如果要講近期大熱劇集嘅話，一定係韓劇《魷魚遊戲》！劇集由李政宰、朴海秀及魏河俊等人主演，題材新鮮及劇情緊張刺激，利用人類嘅童年回憶揭發殘酷人性面，暗諷韓國社會弱肉強食嘅道理，劇集一上線就引起全球追劇熱潮。劇情講述456名經濟困難人士收到有圓圈、三角形與正方形嘅神秘名片，邀請佢哋喺6個遊戲關卡中相互競爭，以爭奪456億高額獎金，每個遊戲都係韓國人細個玩嘅傳統遊戲，包括一二三，木頭人、椪糖、拔河、彈珠比賽、過墊腳石橋及魷魚遊戲，關卡難度逐漸增加，只有玩到最後嘅玩家先有機會攞到獎金，過唔到關或者中途離場嘅玩家都會賠上性命。
《海岸村恰恰恰》
韓劇《海岸村恰恰恰》（又稱海岸村Cha Cha Cha）改編自2004年韓國電影《我的百事通男友洪班長》，搵嚟金宣虎及申敏兒主演，劇集以鄉村愛情作為題材，講述來自首爾嘅女牙醫尹慧珍（申敏兒飾）喺漁村「公辰村」開設牙醫診所，遇上一個同佢迥然不同嘅熱血「洪班長」洪斗植（金宣虎飾），並展開一段浪漫嘅愛情故事。劇集除咗有靚人之外，仲有唔少靚景，令疫情留喺香港，兼打風留喺屋企嘅人緩解旅行嘅心癮。
《今際之國的有梄》
因為《魷魚遊戲》嘅關係，令到唔少以生存遊戲作為背景嘅劇集翻hit，當中包括日劇《今際之國的有梄》。劇集由山崎賢人、土屋太鳳及町田啟太等人主演，講述廢青宅男有栖良平（山崎賢人飾）與友人大吉（町田啟太飾）和張太（森永悠希飾）突然去到一個神秘國度，東京嘅所有人都消失晒，佢哋就同其他參加者被迫參加各種玩命遊戲，從而換取繼續生存嘅「簽證」，如果「簽證」到期又或者輸掉遊戲就會死亡。
《日本沉沒~希望之人》
日劇《日本沉沒~希望之人》改編自經典小說《日本沉沒》，並搵嚟小栗旬、松山研一、杏、香川照之等人演出，陣容相當鼎盛。劇情主要講述環境省官員天海啟示（小栗旬飾）係一個為咗喺政界上位而不擇手段，期間田所雄介（香川照之飾）發表一個巨大災難嘅預言，令到佢喺政途面臨巨大阻力。劇集喺日前（10日）已經收播，收視率錄得15.8％，暫居秋季檔收視冠軍。
《紙房子》第五季
人氣西班牙犯罪劇集《紙房子》已經嚟到最終第五季，而頭五集就喺上月頭上架，餘下嘅集數就將於12月頭登場。今季繼續以警匪鬥智作為主軸，講述里斯本成功進入西班牙銀行與同伴團聚，可惜教授被席耶拉搵到藏身地點並抓住，導致無法與銀行內嘅同伴溝通。銀行嘅劫匪除咗面對人質嘅反抗之外，仲要面對強大嘅軍隊，由搶劫案演變為成戰爭。
《女傭浮生錄》
迷你影集《女傭浮生錄》（Maid）改編自《紐約時報》暢銷書榜作品《Maid: Hard Work, Low Pay, and a Mother’s Will to Survive》，劇情講述單親媽媽Alex當上女傭工作，期間受盡冷言冷語及低薪，不過佢為咗擺脫受虐關係，及令女人過更好嘅生活，堅毅嘅佢依然保持樂觀嘅態度去面對困難。
按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！
