執笠潮｜凍肉店不敵貴租轉戰冷門街市 無懼北上外遊潮：香港人開心就會買嘢食｜Yahoo

【Yahoo 新聞報道】香港經濟復甦不似預期，有小店店主無懼執笠潮，搬舖另起爐灶，落戶「吉舖」甚多的公屋屋邨街市，強調「對自己嘅產品有信心」，並以「免費派肉」等奇招作招徠，尚且能在執笠潮當中存活下來。店主促政府承認經濟下行，「唔好再沉迷喺啲排名度」，盡快落實更多利民紓困措施，「香港人好簡單，開心就會買嘢食嘢」。

相關報道：
執笠潮｜盤點核心區空置率 尖沙咀最慘 中環名店回歸 中資餐飲旺區插旗｜Yahoo

「胾商 Meat Merchant 」老闆孔先生於 2018 年六月開展凍肉生意，最初以工場形式運作，去年疫情完結後決定開設地舖，主因是「難抵孤獨」，「喺工場大部份時間開始同和牛傾計」，便決定於屯門新墟開店。不過他租用新墟地舖短短一年，還未傾租金調整就決定「斬纜」，因租貴、人流不多，「我覺得係我生意上嘅失誤……要做到好攰好攰先 cover 到成本」，故決定尋找其他更合適的位置搬舖。對於開關後大批凍肉舖相繼結業，他指當時不少店舖主打台式急凍食品，例如丸類、蒽餅等，代理商以至貨源大同小異，無特色可言，難以留客。他則專注售賣和牛等肉類，尚算能夠站穩陣腳。

「幾批客咁啱坐同一班機去日本」

不少小店經營困難會選擇「執笠」，孔生也認識一些餐飲商戶「已經執咗，或者有啲老細情緒都好負面」。疫後復常確實有不少顧客外遊，對其生意影響甚大，「幾批客咁啱坐同一班機去日本都有」，生意額較疫情時下跌三成半。他亦理解客人消費心態，「開關之後一定會將佢原先被逼喺香港嘅消費拎去外面（外地），衝擊一定係有，只係大家點樣去面對呢個現實」。孔先生續指，疫前已有不少港人北上消費，疫後更不足為奇，「深圳商場有優惠、疫情期間相信深圳啲商場都有好大變化，啲人都會貪新鮮上去玩」。

那為何選擇繼續經營？孔先生答：「我對市道無希望、對政府無希望，經濟環境都唔係我哋可以控制，但如果呢一刻唔做，其實無人知你之後有無機會返嚟呢一行」，「喺第二個地方重新營業，好過無」。

笑稱山景街市是「閂景」 「一行入嚟已經有堆舖丟空咗」

落戶山景街市重新開業，孔先生在店舖 facebook 專頁亦多次笑言街市是「閂景」，從街市正門入內，「一行入嚟已經有堆舖丟空咗一段時間」。山景街市現時被「民坊」接手管理，並將其裝修成外國火車站主題，街市地面貼上路軌貼紙，走廊上方有「Platform」（月台）字樣。記者實地統計，發現街市有至少九個檔位丟空，當中不乏大型檔位，另熟食區約十檔當中，五間已告結業。《Yahoo 新聞》就此向民坊查詢，截稿前未獲回覆。

雖然街市氣氛頗為凋零，但孔先生指山景這個舖位租金較新墟便宜一半，亦笑言看準店舖對面及旁邊是集運門市及兩餸飯，「收工時間有堆人排喺度，可以畀我騷擾」。他把握人流多的時間叫賣，希望爭取更多生意。店舖試業初期，他更以「奇招」吸客，在街市與邨民的 WhatsApp 群組宣傳，免費派發肉類予街坊試食，「第二日已經有回頭客」。

「如果我啲客唔開心、無嘢慶祝，咁我就X街」

據孔先生的觀察，「大部份熟客消費都係以情緒主導，香港人愈開心、餐飯愈好」。不少客人會購買四人份或以上的和牛，作烤肉、壽喜燒、火鍋等用途，「都係同朋友一齊，會搞 party……如果我啲客唔開心、無嘢慶祝，咁我就X街喇」。除心情影響外，客人移民而減少聚會亦是生意額減少的最大原因。

現時市道看似淡靜，孔指港人過去數年因疫情養成減少夜生活的習慣，消費意欲降低令零售及餐飲業均見下滑，「無安全感就唔想消費，留啲錢喺身邊」。他希望政府「唔好去追逐虛無飄渺嘅世界排名，接受現實香港嘅情況比以前差……承認有啲策略可能失敗咗」，盡快重整旗鼓。

對於新店開業，凍肉店的定位亦是「高、中、低價貨品」全包圍，十數元便可入手冰鮮雞肉，同時亦有和牛出售，豐儉由人；孔先生的目標暫時亦是收支平衡，若然成績滿意，希望再開一間地舖，「我認為我而家賣嘅嘢唔會差得去邊」。他強調營商心態很重要，「積極、有自信，呢兩樣都好緊要」，讓業務繼續營運下去。