夏韶聲拍片講美國邁亞密驚現外星人行走 警方出動逾600警車超誇張

「香港搖滾之父」夏韶聲（Danny Summer）一向熱衷於研究不明飛行物體（UFO）及奇異現象，除咗曾上節目分享目擊疑似UFO嘅經歷之外，佢亦不時喺社交網站分享自己外星探秘嘅睇法及研究。喺噚日（7日），佢喺Facebook上載一條自拍影片，講述日前美國邁亞密一商場外驚現8至10尺高外星人事件，而當地警方更出動超過600架警車圍封，不過事後警方就話當晚只係一批青年喺商場內打鬥，而佢亦有就事件作出分析。

夏韶聲喺影片中講述過去週一喺美國邁亞密一商場外驚現8至10尺高外星人行走，當地警方更出動超過600架警車圍封，不過警方事後就否認有外星人，只係有班青年喺商場內用木棍打鬥。網上只有流傳一條關於當晚由直升機所拍攝嘅影片，不過畫質相當模糊。

之後夏韶聲就事件作出分析，第一點就係點解每一次拍攝關於外星人主題嘅影片及照片嘅畫面都會非常模糊，今時今日嘅科技應該可以影得好清楚。第二點就係如果真係有一個咁高嘅外星人喺商場外行走嘅話，街上有咁多人，但點解冇人會拍攝。而第三點就係如果事件如美國警方所說，只係一班青年用木棍打鬥，咁點解要出動龐大警力，因為連邁亞密市民都話有生之年未見過警方出動600多架警車。

唔少網民都認為件事可疑，留言表示：「如果無外星生物，咁到底咩事要出動600幾架警車圍封？」、「一定係有d野，唔係邊有咁大陣象。恐佈襲擊，打劫，殺人都無咁多差佬啦。」及「影到都唔會比你upload到 佢哋可能censor左段片」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！