夜屯園設霓虹燈招牌打卡點 市民：拆咗先嚟保育就遲咗

【本文獲 獨立媒體 授權轉載】

【獨媒報導】本週末日夜繽紛停不了，一連三日的屯門「夜屯園」周五正式開鑼，首晚場面墟冚，人潮不斷。活動焦點之一為主辦方設置「永發押」當鋪霓虹燈招牌，供市民打卡吸客。有市民表示對霓虹燈招牌感到懷念，但認為「拆咗先攞返出嚟保育就遲咗」；亦有市民認為設招牌打卡純屬噱頭，不過「聊勝於無」。

政府落力推動地區經濟「18區日夜都繽紛」，其中屯門的「夜屯園」由週五起一連三日（12日至14日）在屯門文娛廣場舉行。是次活動與保育組織霓虹交滙合辦，該組織總經理Cardin在社交媒體分享說，今次合作對香港霓虹及保育工作具獨特象徵意義，又指他們都認同香港霓虹能成為有助振興經濟的文化景點。

首晚有不少市民一家大細參加，部分攤檔更要排長龍。現場設有26個攤擋，當中大部分均為食物攤檔，只有少數為售賣手工製品，場內並設有「屯樂有FUN」嘉年華攤位，音樂表演等活動。現場亦有派發消費優惠券、打卡小禮物，包括小鴨銀匙扣、經典鴨扭扭盤及籃球小遊戲等。

市民對霓虹燈感懷念 供小孩近距離接觸「聊勝於無」

「夜屯園」焦點之一為懷舊香港特色，現場放置「永發押」當鋪霓虹招牌，亦有黃色小鴨打卡點。市民馬籽對《獨媒》表示感到十分懷念：「有啲嘢以前成日都見，但宜家已經見唔到。」他又認為霓虹燈招牌為香港文化特色及象徵之一，惟現時買少見少，認為政府在過去應要有意識地去保育：「拆咗宜家先攞返出嚟保育就遲咗囉。」

市民曾先生則認為，夜市擺放霓虹燈招牌純屬噱頭「畀人望一望」，但未嘗不是好事，因小朋友可以近距離接觸，「聊勝於無」。他亦認為，夜市容易令人聚焦吃喝玩樂，如政府有意推廣該手工藝文化，擺放在夜市未必能發揮最大功用。

街坊稱美食攤檔欠特色 望有更多本地手工產品

美食攤檔是夜市不可或缺的一環，場內食物是否吸引？馬籽就覺得，雖然價格不算昂貴，但現場擺檔的大部分為區內熟悉店舖及連鎖店，對屯門街坊而言「有啲唔吸引」：「『添寶手撕雞』我都唔明佢點解要擺檔，因為佢周圍都係，好多地方街市都買到。」他期望夜市有更多本地手工品牌產品攤檔，令夜市有更多特色。

一家四口到場逛夜市的黎先生則認為，偶爾舉辦夜市活動不失為好選擇，有助刺激人流，但仍覺得部分攤檔欠缺特色：「好多攤位都係賣啲魚蛋燒賣嗰啲，來來去去都係呢啲，我覺得無咩特色囉，香港咁多年都係魚蛋燒賣。」