大事回顧︳《魷魚遊戲》熱爆全球 打破英美劇壟斷Netflix收視局面

·2 分鐘文章

韓片《上流寄生族》奪得奧斯卡最佳電影,為外語電影打開英語市場缺口,今年輪到韓劇《魷魚遊戲》再建奇功。

9月中於串流平台Netflix播放嘅《魷魚遊戲》,故事以一場456人參加嘅大型集體遊戲為背景,參加者要玩舔椪糖、一二三紅綠燈等多項韓國坊間童年遊戲,最後贏家能夠得到456億韓元獎金,但係輸家就會輸埋條命。

即使唔係英語對白,但故事橋段以至節奏都吸引唔少歐美地區用戶收看,令《魷魚遊戲》成為全球大熱劇集,喺全球94個地區登上收看榜榜首。《魷魚遊戲》播出後17日,收睇人數接近1億2千萬,打低Stranger Things、Bridgerton等劇集,成為Netflix史上最受歡迎劇集。

劇中多位演員因此爆紅,IG追蹤人數倍增,飾演韓美女嘅金姝怜原本只有400人追蹤,截至年底已經變成座擁230萬粉絲嘅大戶,升幅5千幾倍! 飾演姜曉嘅女星鄭浩妍更被荷里活媒體Variety選為「年度突破國際新星」,名單上仲有MIRROR成員姜濤。

金姝怜
金姝怜

《魷魚遊戲》獲提名角逐今屆金球獎最佳劇集、男主角(李政宰)及男配角(吳永秀),有望打破非英語劇集獲獎紀錄。而影評網Rotten Tomatoes上網友對《魷》予以好評的比率高達9成。獎項以外,坊間各種戲仿活動亦足證劇集喺全球嘅威力。今年萬聖節就有唔少人著上綠色運動衫襯「白飯魚」扮參加者;台灣有片商將橋段拍成AV版,並命名為《鮑魚遊戲》;就連香港TVB劇集《愛.回家之開心速遞》都拍個惡搞版《鹹魚遊戲》,更搵到貌似男主角李政宰嘅譚俊彥客串。

劇集主腦透露已經準備開拍第二、三季,續集以李政宰飾演嘅成奇勳出發,並會解開第一季留下嘅謎團。到時相信又會再次掀起《魷魚》熱!

按此下載 全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載

我們致力為用戶建立安全而有趣的平台,讓他們與志同道合的用戶聯繫交流。為改善我們的社群體驗,我們暫時停用文章留言功能