大劉暫停生活費資助 黎彼得仍心存感激 同許冠傑難以破冰

73歲嘅TVB綠葉演員兼填詞人黎彼得，去年因為入院做「通波仔」手術，被TVB安排「休息」。但本身喺《愛．回家之開心速遞》演豹叔嘅Peter哥，出院後未獲重返劇組，甚至多次打俾TVB高層珍姐（曾勵珍）求助都不獲理會。手停口停之下，黎彼得經濟拮据，但係富商劉鑾雄主動資助Peter哥手術費及生活費，契仔黃宗澤（Bosco）、同事鍾志光等人亦出手幫忙，協助佢度過難關。同TVB關係轉差之後，Peter哥亦索性唔續約。

近排黎彼得接受傳媒專訪，睇落精神狀況好好，佢透露大劉已經停止資助佢嘅生活，但Peter哥依然心存感激，仲話當日大劉俾佢嘅錢多於佢一年生活費。

黎彼得稱前妻多年前「走佬」，由於要獨力撫養兒子而工作繁忙，令父子關係麻麻，平時鮮有溝通。兒子今年34歲，正在南京讀中醫，Peter哥仍希望財政上照顧好個仔。

父子關係之餘，黎彼得同曾經友好嘅許冠傑及黃子華，關係都難復當年。黎為許冠傑多首名作譜詞，兩人經常一齊通宵達旦創作。Peter哥相信因此令許太懷疑佢哋去咗玩，而Sam哥當年都向佢提過太太「詐型」。佢又相信即使有機會見面，大家都冇嘢好講，即使對方請佢去睇演唱會都唔會到。不過Peter哥對於當年同許冠傑共同締造嘅佳績，仍然津津有味，又認為可一不可再。

至於黃子華同Peter哥因為拍劇而熟稔，有時會傾通宵，但近年已經冇聯絡。黎彼得仲話「而家人哋係子華神，我係人，點溝通呀？」。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！