大S閃婚︳具俊曄係第一代攻台韓星 一場車禍逆轉星途

去年11月同汪小菲離婚嘅台灣女星大S（徐熙媛），今日宣布同52歲韓國男藝人具俊曄結婚。消息震撼兩岸娛圈，唔止因為大S離婚107日就再婚，亦因為呢段婚訊揭出佢地廿幾年前原來交往過。

香港觀眾未必熟悉具俊曄，但係佢所屬團體CLON（酷龍）可以話係韓流先鋒，曾經到台灣開演唱會，九十年代嚟講算係異數。具俊曄同大S就係咁而認識！

具俊曄大學時代參加舞蹈比賽奪得冠軍而入行，後來被韓國金牌音樂人金昌煥相中，同姜元來組成二人男團CLON出道。1996年推出首張專輯Are You Ready已經橫掃韓國，以Hip-Hop、R&B、Rap等風格帶領潮流，亦係日後韓流曲風嘅示範作。CLON有唔少歌曲都被華語歌手翻唱，杜德偉嘅《救你》就係其中之一。1999年CLON曾經去台灣開演唱會，專輯《New World》更加賣出過百萬張，人氣之高可想而知。

正因為CLON大受歡迎，具俊曄同大S只能以地下情發展，更因為避免戀情曝光而拒絕上大S主持嘅《娛樂百分百》，成為分手導火線。但係2000年具俊曄隊友姜元來遇上車禍導致下半身癱瘓，CLON全面停工，具俊曄要等到3年後先以DJ KOO身份單飛出碟。好在後來具俊曄嘅DJ事業發展順利，佢自己亦都經營夜店同服裝品牌，努力之下喺韓國樂壇仍有一席之地。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！