奧運 fun fact｜港隊驚喜還有他！離銅牌戰只差一步的跆拳道第一人盧蔚豐：去盡仍然有機會贏返嚟｜Yahoo

隨住張家朗、江旻憓、何詩蓓等獎牌運動員凱旋歸來，部分港人少咗關注港隊奧運消息，但係琴晚港隊陣中突傳來驚喜，跆拳道港將盧蔚豐得到幸運之神眷顧，獲得「復活賽」資格，贏咗就直入銅牌賽，令到唔少市民即刻醒一醒睇直播，大編亦即刻開工，陪大家凌晨睇比賽！

1 講返奧運跆拳道呢個項目，自2000年悉尼奧運會正式納入比賽，惟香港24年來都未曾打入呢項運動，直到今屆巴黎奧運，21歲、身高1.9米嘅盧蔚豐獲得男子68公斤以下級別出賽資格，成為香港跆拳道嘅奧運第一人。咁香港有幾多人玩緊跆拳道？盧賽前講過，佢係代表香港十幾萬名跆拳道愛好者出戰奧運，將會帶住一份使命感而努力。

2 其實盧蔚豐打入奧運之路都有轉折，佢今年3月出戰亞洲資格賽得第三，本應無緣巴黎奧運，但係因為一名難民隊選手被取消資格，令賽前世界排名第209嘅盧蔚豐能夠以後補身份，初登五環大舞台。佢參加嘅級別有17位運動員，被列第17號種子。佢講過，從來未參加過咁大型賽事，難免緊張，但會將壓力變做動力。

3 有幸運，亦要有實力。盧蔚豐首戰奧運，就憑身高優勢交出功課，擊敗世界排名比自己高出8位嘅難民隊代表Yahya Al Ghotany，仲要係連續兩局以大比數勝出，分別係14：0同16：4，其中第一局四度踢中對手頭部得分，對手幾乎無佢嘅埋身機會，盧以令人眼前一亮嘅表現躋身16強。（編按：比賽採三局兩勝制，每局限時兩分鐘，擊中對手身上不同位置可得不同分數，踢中頭有3分，每局較高分者勝出局數，若任何一方領先12分即直接取一局）

4 呢位港將喺巴黎再一次獲幸運之神眷顧，佢雖然喺16強賽事輸咗俾力爭衛冕嘅烏茲別克「世一」選手拉斯拖夫（Ulugbek Rashitov），但由於對方成功打入金牌戰，根據賽例盧蔚豐可以「受惠」得到一個「復活賽」名額，對戰喺8強不敵拉斯拖夫嘅中國選手梁育帥，勝方可以直接殺入銅牌賽爭獎牌。盧蔚豐賽後表示，等呢場「復活賽」足足等咗7個鐘先知有冇名額，「未試過等咁長時間，但都冇鬆懈，隨時準備好，因為機會係留俾有準備好嘅人」

5 雖然盧蔚豐最終以0：2輸俾中國選手梁育帥，距離銅牌戰仲差一步，而梁育帥就喺英國對手退賽下奪得銅牌。不過盧蔚豐係香港跆拳道奧運之路第一人，每次晉級甚至每場比賽，都已經為香港跆拳道寫下歷史新一頁。港隊教練蔡永強就形容佢係「大賽型選手」，讚揚面對勁敵仍不畏懼。

6 盧蔚豐喺巴黎奧運跆拳道（男子68公斤以下級別）以總排名第七完賽，可獲「賽馬會優秀運動員獎勵計劃」獎金$37.5萬港幣。

7 盧蔚豐喺16強賽敗於與自己同年出生嘅烏茲別克「世一」，其實佢喺杭州亞運都輸過俾呢位對手。盧蔚豐曾講過，雖然對手名氣大，但佢冇諗太多，放膽嘗試去衝。輸咗之後佢就同自己講，「如果我再努力啲，或者真係有得打」。

8 盧蔚豐喺奧運再次輸俾呢位「世一」，佢無輕易灰心，賽後仲提返亞運嘅敗績，「當時實力差距好大，今次雖然落敗，但係差距收窄咗，整體都滿意今日表現！」而呢位「世一」亦成功喺今屆摘下金牌衛冕。

9 「追求卓越」、「建立友誼」及「尊重自己及他人」係奧林匹克精神，盧蔚豐面對「世一」對手著重自己有冇進步、同對手實力差距有冇收窄，正正就係「追求卓越」嘅體現。

10 盧蔚豐完賽後接受訪問時話，雖然無緣獎牌，但仍好享受比賽。「未到最後一刻都唔好放棄，去盡，仍然有機會贏返嚟！」佢表示會吸收今屆奧運經驗再求進步。

其實奧林匹克精神冇一項話一定要攞金牌，除咗獎牌運動員值得大家欣賞，所有為香港登上五環舞台、代表香港出賽嘅運動員都好值得市民關心。期待港將往後繼續帶俾大家驚喜，同埋分享更多背後嘅故事。