好心痛︱鄭嘉穎爆陳凱琳佗B雙腿腫到唔見腳眼

好心痛︱鄭嘉穎爆陳凱琳佗B雙腿腫到唔見腳眼

藝人鄭嘉穎今日(8日)出席品牌新店宣傳活動,談到太太陳凱琳(Grace)懷第3胎的情況,他大表心痛謂:「每胎反應都唔同,可以話呢胎係最辛苦嘅,有水腫同抽筋嘅情況出現。佢雙腿幾幼大家都知,竟然可以腫到見唔到腳眼,佢梗係唔開心,我惟有安慰佢,呢啲日子好快過!」

嘉穎透露有出手為Grace按摩。當問到打算怎樣獎勵對方,他笑答:「生咗出嚟先啦。(講得仔定女未?預產期幾時?)留番我太太公布,但我可以講會好快喇。(生埋呢胎收工?)我哋順其自然嘅。」

由於家有新成員,嘉穎坦言即使通關,短期內亦不打算北上工作:「除非個角色好吸引,如果我唔接會後悔嘅。(無綫冇搵你?可以留港開工?)之前我拍《星空下的仁醫》,返去只見到2個仔瞓緊覺,冇時間同佢哋玩,真係望都唔望你!」他坦言現階段一切以家庭為主,不想錯過小朋友成長每刻。

談到好兄弟馬國明終宣布婚訊,嘉穎表示:「恭喜咗佢喇,都就嚟『入五』,應該要結婚,有仔趁嫩生。(好有感受?)梗係啦,佢哋戰鬥力每日升,我嘅體力每日降。(《鐵馬尋橋》得番同詩詠單身喎。)佢自有打算,遇啱先啦,千祈唔好為咗結婚而結婚。(介紹好嘢畀佢?)去到我啲年紀好嘅都結晒婚,未結嘅就真係唔想結,冇貨。」