好睡好起｜方東昇全新睡眠節目5.25首播 節目預告一貫搞笑風格

方東昇《尋人記》系列口碑極好，兩季節目尋找昔日新聞被訪者和故事人物帶出濃厚人情味，特別係「龜兔夫婦」Sabrina與Frankie故事感動無數觀眾，方東昇於第二季最後透過旁白感激接受過節目訪問嘅「平凡人」成就《尋人記》；《尋人記II》亦令方東昇奪得《萬千星輝頒獎典禮2022》最佳男主持，當時方東昇缺席，並由《尋人記II》監製黃淑明上台代領，黃淑明透露方東昇正籌備新節目，亦笑指佢要瞓覺所以出席唔到頒獎禮。原來，當時所指嘅「瞓覺」正正就係指方東昇全新健康節目《好睡好起》。

早於去年11月底《節目巡禮2023》，已釋出方東昇將會主持《好睡好起》嘅資訊，TVB總經理（商業營運）蕭世和曾於社交平台透露今年方東昇無意添食《尋人記》，反而以睡眠作主題製作全新節目《好睡好起》：「不明白『究竟睡眠有甚麼好講？同事都摸不著頭腦』，過去方東昇曾製作過以健康為題材的《長命百二歲》，並反映有客戶雖不肯定節目內容是甚麼，但相信會有質素保証及會心微笑的金句。」《好睡好起》共10集，將會於5月25日首播，節目內容至今仍相當神秘，只見方東昇於節目預告中搞笑地連眼鏡都無除就扮瞓覺，不過相信一定少不免大量金句；而且方東昇曾被共事過嘅同事大讚做嘢認真，寫稿唔會搬字過紙，所以估計節目會一如方東昇過往主持風格，搞笑又認真。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！