好睡好起｜Lucy媽媽勁坦白 直指冇錢收全因方東昇而拍

方東昇《尋人記》系列口碑極好，兩季節目尋找昔日新聞被訪者和故事人物帶出濃厚人情味，觀眾當時大讚方東昇主持功力夠晒專業，又表示佢係金句王，紛紛希望添食推出第3季。不過上年年底嘅《節目巡禮2023》就釋出方東昇將會主持全新《好睡好起》，而節目亦將於5月25日首播，10集節目中將會顛覆大家對睡眠世界嘅想像，表示想瞓得好，就要從睡前做起；方東昇於節目預告中更加連眼鏡都無除就扮瞓覺，相當搞笑。

日前節目釋出宣傳片，片中更有李璨琛囡囡Lucy瞓喺床上，應該係客串做有關睡眠嘅實驗，而Lucy媽媽亦有喺IG上載家人與方東昇等人嘅合照，並留言話：「仲記得當時TVB黃曉瑩問我可唔可以幫幫手拍呢個節目，其實我唔係好想so佢因為冇錢，之後唔知點樣佢話原來佢阿頭係方東昇，我二話不說即刻應承佢，嘻嘻 #我愛方東昇 #如果拍續集我都可以幫你 #因為我細女都有嚴重嘅睡眠問題 #好睡好起 #多謝邀請」。過往Lucy媽媽不時被網民指用Lucy去賺錢及Lucy太拋頭露面，不過今次佢直指係冇收錢，睇嚟佢真係好鍾意方東昇。唔少網民都留言指Lucy媽媽夠坦白，留言「哦！因為冇錢 想唔接 又因為方東昇 所以接 明白曬」、「咁坦白，因為無錢」及「無錢收、我鍾意你」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！