姚焯菲留學 隨時回歸 陳山聰帶隊出埠 賺新年財

農曆新年將至，加上防疫措施放寬，市道逐漸復甦，出爐視帝陳山聰亦工作多多，忙拍劇的他透露農曆新年會出埠搵真銀：「忙係好事嚟嘅，新一年祝願香港所有人有工開！」

視帝陳山聰、聲夢歌手姚焯菲（Chantel）及鍾柔美（Yumi）等，前晚為新春節目進行錄影。有多年舞獅經驗的山聰為節目開場，醒獅助興，他表示：「新年大家醒一醒，好兆頭！身邊好多舞獅朋友今年終於有嘢做，因為每逢新年或喜慶，啲商場會請佢哋表演。好事嚟嘅，證明興旺番，新一年祝願香港所有人有工開，最緊要身體健康！」

教囝囝舞獅

他透露已開始培育囝囝Jaco學舞獅：「佢唔驚，仲好鍾意，肯笠個獅頭。（有冇讚你舞獅有型？）佢未識，不過識讚我靚。上次頒獎禮套衫我喺屋企試咗一次，佢話：『爸爸，好靚喎！』」正趕拍劇的他透露年廿九「收爐」可休息數天，待年初三就會偕拍檔劉佩玥及陳展鵬等出埠工作。

至於Chantel即將到新西蘭升學，她透露農曆新年後就會起行：「嚟緊仲有工作。（趁新年賺多啲？）冇諗搵幾多錢，係想走之前見多啲大家。」她指早前已先後與同學及《聲夢》學員食飯餞行。因有事在身而未有參與飯局的Yumi，表示若有空會去送機，Chantel稱只要學校放假，她就會立即返港見大家：「好快返嚟，喺嗰邊減定肥，然後返嚟同大家再食飯！」