姜濤演唱會海報出爐被指致敬偶像羅志祥 大頭浸水照激發網民想像

今個夏天MIRROR 4位成員分別舉行個人音樂會，早前阿Jer（柳應廷）同Anson Lo（盧瀚霆）嘅宣傳海報已經曝光。而8月初開show嘅姜濤，到尋日就公布音樂會名為WAVES IN MY SIGHT，食返個「濤」字，亦同文案一句「逆流之中緊握初衷」配合返。

而海報嘅相就係姜濤浸喺水入面，只係見到半塊面。咁靚仔但係睇得半個樣，會唔會太浪費？

好多網民睇完都議論紛紛，有人拎返姜濤偶像羅志祥去年喺台北小巨蛋舉行嘅演唱會海報做對比，兩者都係主角浸喺水中，不過小豬張相係影側面，姜濤就係正面。而且姜濤嗰張係黑白色調，而小豬嘅只係背景色調灰藍，但個大頭仲係彩色。

無獨有偶，今年年初女歌手Moon Tang嘅演唱會海報，都係玩「大頭浸水」概念，不過加上藍色眼妝配合I’m not crying主題。

其實向來將主角浸喺水中影相嘅概念，向來都有唔少，經典電影《現代啟示錄》復修版嘅海報，就選取主角查理辛由水中「冒出頭來」呢個畫面做海報。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！