姜濤疑咪嘴惹熱議 IG限動回應 第13胎創作班底網民期待

MIRROR成員姜濤前日（4日）為喺會展舉行嘅首屆《共創明「Teen」計劃》畢業禮擔任壓軸嘉賓，期間喺台上獻唱《Master Class》和《蒙著嘴說愛你》。姜濤喺跳唱《Master Class》後，多謝大會邀請及表示喺學生哥面前表演緊張過開演唱會，並指歌曲係佢入行以來嘅心得及鼓勵年輕人追夢。之後，姜濤就唱出《蒙著嘴說愛你》，喺唱到接近尾聲時，大會安排咗4名小朋友上台，不過姜濤未有發現佢哋喺身邊，喺察覺到嘅時候就嚇咗一跳，然後就蹲低搭住旁邊嘅小朋友話「你哋出咗嚟呀？」，之後就忍不住喪笑，唱唔到落去。由於現場仲播住《蒙著嘴說愛你》嘅墊底聲，所以唔少網民都認為佢咪嘴唱歌，不過亦有網民指有同事喺現場，姜濤有現場唱歌，只係墊底聲太大。

喺活動結束後，姜濤疑似咪嘴唱歌，隨即成為網上熱門討論話題，而噚晚姜濤喺IG限時動態上載演出當日坐車嘅側面個人照片，並寫上：「沒甚麽好說的 繼續努力」，疑似就事件作出回應。另外，佢亦有喺限時動態上載喺後台同小朋友們嘅合照，仲留有一個心心嘅emoji。

除此之外，姜濤早前表示自己正在籌備13胎歌曲，而喺噚晚佢就公開創作班底嘅陣容，歌曲由林家謙作曲、黃偉文填詞、及Edward Chan監製，留言話：「將近兩年了 終於要好好的把你生出來了 #十三胎」。唔少網民及姜糖都紛紛留言表示期待，例如「終於等到了，等到頸都長」、「wow 家謙同Wyman 好期待呀」、「好期待呀～呢個組合」、「呢個combination不得了」、「超強基因的13胎」及「期待，幾時可以接生？」等等。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！