婚後事｜煒烈演「廢老」老爺獲讚入型入格 「你老母西蘭花」原來係咁嚟

TVB都會愛情劇《婚後事》由羅子溢（原名：羅仲謙）、陳自瑤、黎諾懿、賴慰玲、羅天宇及王敏奕等人演出，第一章節「離婚」主要圍繞潘善仁（羅子溢飾）及張明芯（陳自瑤飾）嘅婚姻。劇集播出短短幾日已好評滿滿，除咗羅子溢及陳自瑤人氣急升之外，飾演「廢老」老爺潘良嘅煒烈演得入型入格同樣備受關注。

煒烈喺《婚後事》中飾演「廢老」老爺潘良，佢係一個冇責任心嘅爸爸，不過潘善仁為咗圓媽媽遺願，所以就接咗爸爸返屋企住，結果搞到老婆要照顧陋習多多嘅老爺，兼要幫手分擔賭債，成為二人關係惡化嘅導火線。之後，明芯更使橫手將呢個難頂老爺送往老人院，而面對家嫂嘅決絕，老爺驚到未驚過，繼續喺老人院鬧事。當佢知道善仁同明芯對薄公堂，喺度爭緊孫女潘悅（鄭淽月飾）嘅撫養權時，佢即時鬧爆明芯：「正臭雞，最毒就係婦人心㗎啦！」 及叫阿仔要快啲奪回囡囡管養權。唔少網民一聽到「臭雞」，就聯想起《巨輪2》中高天鷲（吳岱融飾）大罵鍾穎（李佳芯飾）係「臭雞」 。

另外，潘良更衝去明芯公司講數，要求六位數字嘅搬走費，之後明芯就話冇錢，爭媽媽嘅錢啱啱先還清，潘良就話：「即係你老母西蘭花有啦？！」明芯表示唔想媽媽操心就話：「你唔要面，我要」。點知潘良就開始嚟料，話：「你唔好當我嚟乞先得㗎，你賺嘅每個崩呀，我個仔都有功勞㗎，唔係佢留喺屋企做湊仔公，你邊有得做老闆娘咁風光呀」、「你喺度扮慘呀？你慘得過我？我都係做好心，唔再連累個仔啫，咁就盡地一煲卒之乜都冇晒，唔覺意爭人幾廿個，你估我想㗎？」、「喂！八婆，而家想我搬嗰個係你呀，度縮度縮嗰個又係你，你想唔畀錢吖嘛，我唔搬咯，咩事呀」、「都叫咗你唔好咁臭四㗎啦，成日為咗我啲嘢啄Q住個老公，男人要面㗎，推個老公出去滾，你怪得邊個呀？」、「好！你今日姨媽到我唔同你計咁多，慢慢先同你計數。」

劇集出街後，唔少網民都非常同情明芯；同時大讚煒烈演得入型入格，值得拎最佳男配角，留言話「煒烈好戲！對白唸得好好，夠市井，好有舊時港產片嘅味道」、「呢d對白真係絕」、「明年最隹男配角惡老爺 非你莫屬」、「烈爺好戲」、「煒烈可以做鷲哥2.0」、「幾好戲/又搶戲」、「阿老爺真係好自然 老戲骨真係沒話說」、「老爺都演得好好」、「估唔到老爺咁好戲, 夠晒賤格」、「廢老攞最佳男配角啦」、「老爺咁好戲」、「廢老做得勁似廢老」及「真係做得好似d最基層既廢老 d對話用字好貼地」等等。

關於「你老母西蘭花」嘅句對白，煒烈就解釋話因為明芯個媽媽叫Nancy，所以佢個角色就亂咁叫佢西蘭花。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！