婚後事｜羅冠蘭因愛徒賴慰玲出山 相隔5年再拍TVB劇

TVB熱播劇集《婚後事》由羅子溢（前名：羅仲謙）、陳自瑤、黎諾懿、賴慰玲、羅天宇及王敏奕等人演出，被指劇情真實貼地，收獲大量好評。《婚後事》以多種視角敘述愛情及婚後世界，上周播出羅子溢與王敏奕「不忠」故事，久未喺TVB演出嘅羅冠蘭驚喜登場，飾演王敏奕及賴慰玲外祖母花婆。上周一（4日）播出一集，花婆（羅冠蘭飾）因Mira（王敏奕飾）和Tim（羅子溢飾）爆出婚外情而被狙擊，更因此摔下樓梯受傷入院，Mira趕至醫院探望，花婆非常擔心孫女，及後得知事實真相自責，又與Mira相擁而哭，感動唔少觀眾。

於周三（6日）播出一集，花婆與程天暉（羅天宇飾）互動場口溫馨感人。該集以程天暉視點出發，標題係「約炮世代，無所謂不忠」，天暉夢想成為頂級導演及監製，為咗理想無錢無時間無精力，索性唔拍拖只靠交友手機程式「約炮」，一直以為自己當Mira係好兄弟，直到目睹Mira與善仁偶遇時火花四濺一刻，發現早已深陷Mira魅力，但Mira講明對自己無「性趣」，只能竭力壓抑。劇情又講到花婆對住「死鬼老公」猛叫Love You，以及向天暉發表「上世紀長情論」，表示：「第日我兩腳一伸，同我Honey葬埋一齊，呢啲就叫落葉歸根喇」；天暉則指：「外婆有福氣，嫁咗個好老公」、「聽你啲故仔，好似古代神話咁，從一而終嘅愛情，上個世紀先有架咋」，睇到觀眾大為感動。

羅冠蘭曾憑電影《我和春天有個約會》勇奪第14屆香港電影金像獎「最佳女配角」，令人印象深刻嘅角色包括《烈火雄心》群姐、《天子尋龍》武則天等等。不過，羅冠蘭近年致力於戲劇表演教育工作，鮮有幕前演出，對上一部參演劇集已經係2019年《牛下女高音》，今次「出山」拍攝，全因賴慰玲。羅冠蘭曾為香港演藝學院擔任副教授，當年賴慰玲就係佢學生，畢業後亦係羅冠蘭推薦佢參與劇集《女人俱樂部》試鏡，因而加入演藝界。今次因為賴慰玲與劇組都覺得羅冠蘭適合出演「花婆」呢個角色，加上賴慰玲渴望與師傅上演一場 「婆孫情」，因而主動向羅冠蘭力推角色及劇本，最終成功打動羅冠蘭參演《婚後事》。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可換領限量新人禮，立即下載！