【《學是學非》元祖級主持】梁嘉琪效力13年低調離開無綫 轉戰網店

近年唔少小生花旦及綠葉演員都相繼離巢，最新就有《學是學非》元祖級主持梁嘉琪。有傳因梁嘉琪上年為社會事件發聲，喺社交網站上一張寫有「加油」字嘅黑白相片，之後就疑似被無綫雪藏，連《學是學非》都被叮走，演出工作大大減少，最近仲有指效力13年嘅「是非精」梁嘉琪近月已經低調離開無綫。

畢業於香港演藝學院嘅梁嘉琪，加入娛樂圈後第一份工作即加入有線電線擔任娛樂主播。2007過檔無綫後，佢獲得唔少演出嘅機會，當中最為人熟悉嘅一定係成為綜藝節目《學是學非》元祖級主持，佢喺《學是學非》做足6輯，形象深入民心，可惜去到上年8月被叮走，正式喺「是非精」行列畢業。佢除咗為唔少節目擔任主持之外，仲有為唔少嘅劇集演出，例如喺《學警狙擊》花若葆、《女拳》唐雪喬、《回到三國》黄月英、《師父·明白了》歡静及《師奶MADAM》蘇鳳妮，實行拍劇及主持兩棲發展，而J2嘅《血併全世界》就係佢最後一個節目。

喺接受傳媒查詢時，梁嘉琪就話現時唔方便透露合約，想放多啲時間喺自己網上生意賣自家設計嘅特色裙。另外，佢仲話多謝公司俾咗好多機會佢，有新工作喺度傾緊，確實咗會通知大家。