宋芝齡落選區會直選獲委任為「三會」成員 何猷亨 前主播李臻紛紛「入會」
政府喺尋日公布稱為「三會」嘅三個地方諮詢組織新一屆成員名單,近3千人榜上有名,當中不乏熟悉嘅名字。
TVB節目《流行都市》主持宋芝齡獲委任為灣仔東分區委員會成員。去年宋芝齡以自由黨成員身份,參選區議會灣仔選區直選,以3043票未能當選,敗給獨立候選人李碧儀及民建聯穆家俊。
本身多多生意在手嘅宋芝齡近年投身政界,更出任自由黨灣仔支部主席,區選前更參加地區派米活動。而《流行都市》另一主持謝芷倫嘅老公馬志恆,去年出戰九龍城南選區直選同樣落選,但亦獲政府委任為九龍城區撲滅罪行委員會。
至於賭王何鴻燊四房次子何猷亨就獲委任為東區撲滅罪行委員會成員。曾於TVB及Now新聞台出任主播嘅有線前新聞總監李臻,就獲委任為南區撲滅罪行委員會成員。
按此下載全新Yahoo APP,睇盡最新娛樂新聞、樂壇消息、名人熱話、熱門電影、Netflix劇評,新人更可即時換領限量新人禮,立即下載!