薯片袋、X光片唔係垃圾！90後創家居上門回收服務 每年回收量達100噸

【Yahoo 新聞報道】日常家居回收離不開三色筒的紙、鋁罐和膠樽。有90後創辦家居回收公司，提供付費上門回收服務，覆蓋逾40個種類，包括薯片包裝、Gas罐、陶瓷甚至X光片，每年總回收量高達一百噸，並分配到本港多間回收廠。創辦人希望更多港人徹底改變掉垃圾的習慣，只要回收得宜，「呢個世界其實無垃圾」。

記者：Carmen C.

攝影記者：HLKP

The Loops家居回收公司創辦人Jorch笑言，年少時並非特別注重環保，直至在大學讀新聞系時寫過有關垃圾問題的報道，之後到日本朋友家居住一個月，「佢哋真係無乜垃圾，分得好仔細」，令他有所感悟，「呢個世界其實無垃圾，『垃圾』呢個字其實係我哋自己做出嚟」。

Jorch返港後建立回收習慣，但發現某些回收點只收一般膠樽，「回收發泡膠，係要攞去距離我屋企45分鐘路程嘅『不是垃圾站』」，便萌生一個念頭：「有人幫我搞晒所有嘢就好喇！」他投身社會工作後，決定創立The Loops，「不如喺最有力又最低成本嘅呢十年入面，做件唔後悔嘅嘢」。

網球攪碎鋪球場 薯片袋變隔水物料

現時「綠在區區」收集8種常見回收物料，The Loops回收種類則逾40款，除了常見的紙、膠外，還包括鋁箔袋（薯片或即食麵袋）、發泡膠、包書膠、各式化妝品瓶、冰種，甚至X光片及網球。Jorch續指，X光片可打碎成為填充物料，網球就可攪碎成橡膠，「用嚟鋪網球場」；鋁箔袋在一般情況下不能回收，但他尋得廠商可將其溶解，再造成隔水物料。

回收物多元化，處理成本亦相對高，包括聘請員工洗淨化妝品樽、人手分類及運至處理廠。Jorch遂大膽嘗試推付費回收服務，用戶每月繳付128元，每周可享一次定量上門回收服務，只須把回收物放進公司提供的回收籃，掛在門外，職員就會上門回收。用戶繳付的月費成為公司主要收入來源，公司亦有與其他公司合作，向付費客戶回贈各式優惠券，近月每戶可得總值逾200元的優惠券，比回收月費還要高。部份合作夥伴亦有環保、可持續發展背景，如裸買店Slowood、環保超市GreenPrice等。

「好多人覺得回收啲嘢已經要洗，仲要畀錢你？」Jorch明白有人會對付費回收服務卻步，「少少明白呢個想法，但多多嘅唔甘心」。他指速遞公司到付亦要數十元，「點解我上門收垃圾、再分類，再寄去十個地方做回收會係free？」現時The Loops收回的物料受法規所限無法出口，因此百分百於香港處理，先送到新蒲崗的廠房作分揀，洗淨後交予不同回收廠，如專收紙品的Mil Mill、回收發泡膠的「迷失的寶藏」等。

目標擴展全港 推廣回收文化

付費回收在商業上可行嗎？Jorch未有透露收支情況。經營三年，The Loops每年約回收100噸回收物，他坦言「唔算好多」，回收服務現時覆蓋全港七區，單計將軍澳區便有300個客戶，亦有商業客戶。客戶群亦相當廣泛，不少也是同意並理解Jorch的理念，「最初仲諗會唔會有啲人係有錢啲，先多啲餘力去做呢樣嘢呢？但發現其實唔係，好多區嘅公屋客戶係多過私人屋苑」。Jorch希望今年內將業務擴展至全港一半地區，長遠目標是覆蓋全港，推廣回收文化，逐步改變港人掉垃圾的習慣，「一個垃圾桶入面有紙杯、膠兜、廚餘、發泡膠，其實每一樣嘢都有自己個名，但撈埋一齊你就叫佢垃圾。如果分返開，一棟發泡膠可以變返一舊膠，再變返做衣架，就係要錢買嘅產品。」

The Loops 家居回收

facebook專頁：https://www.facebook.com/theLoopRecycle

• 更多綠色新聞🌍資訊，即睇「Yahoo可持續發展」專頁！