家族榮耀︳外父億萬身家 黃浩然老婆曾被爆與已婚男親熱合照

《家族榮耀》劇情步入戲肉，上周馬家二公子耀祖車禍身亡，引發馬家新一輪明爭暗鬥。飾演耀祖嘅黃浩然，因為有外遇兼有私生女同老婆甄芯（楊茜堯飾）鬧出婚姻危機，但係現實中model出身嘅黃浩然，入行後唯一伴侶就係由女友變老婆嘅形象指導莫家嘉(Kaka)。拍拖加埋結婚接近20年，黃浩然試過患怪病皮膚潰爛，Kaka被爆同已婚男親密合照，但無損二人恩愛，間中喺IG大晒幸福，閃到爆！

婚前係形象指導嘅Kaka 曾經喺森美嘅電台節目談及同浩然嘅相識經過。黃浩然拍《新紮師妹》飾演劍雄而被觀眾認識，佢同Kaka亦因為拍呢套戲而正式認識，但係原來佢地有機會更早相識。Kaka嘅舅父本來想當時單身嘅Kaka搞「相睇」，其中一個人選係拍《孤男寡女》演才俊嘅浩然。不過Kaka怕尷尬又驚高攀唔起靚仔而拒絕。

後來Kaka同浩然終於因為工作而認識兼拍拖，Kaka曾經因為浩然嘅無微不至而覺得有可疑，以為遇到老千！拍拖4年後，Kaka同浩然結婚，2個仔分別喺2011及2013年出世。全力拍劇嘅浩然2014年患上罕見嘅「貝塞特氏症」，導致喉嚨嚴重潰爛，食半碗粥都要個半鐘，仲暴瘦十幾磅。康復後浩然減產兼戒煙，一切家庭為重。

2018年有傳媒收到讀者爆料，指Kaka同一位已婚男關係密切，仲有親密合照流出。浩然回應時澄清係舊相，又話事件純屬笑料一則。

黃浩然外父係前馬主莫英儒，據知身家過億，而黃浩然一家住緊嘅寶馬山豪宅亦係外父名下。浩然曾經表示外父從來冇質疑過佢有冇能力照顧老婆，又強調有交租俾外父。

按此下載全新Yahoo APP，睇盡最新娛樂新聞、樂壇消息、名人熱話、熱門電影、Netflix劇評，新人更可即時換領限量新人禮，立即下載！